Nongstoiñ, Naitung, 09: Ki Pulit ka Nongstoiñ Police Station, ki la kem ïa u briew uba la phetrieh hadien ka jingthang ïa la ka jong ka ïing, ïa ki tiar ki tar, ki jaiñ ki nep bad wat ïa ki kot skul jong ki khun.
Une u briew u kyrteng u Albertstar Nongphud 43 snem ka rta bad ki pulit ki la ïoh kem noh ka sngi saitjaiñ jong ka taiew ba la lah ha ki thaiñ Nongstoiñ.
Katkum ka khubor Pulit, une u briew u la leh ïa kane ka kam bymman ha ka 5 tarik Naitung ha ka shnong Phudumbah Sepngi, West Khasi Hills.
Ki Pulit ki ïathuh ba ha ka por 1:00 baje mynstep, une u briew u la sei ïa ki tiar ki tar na ïing sha phyllaw bad u la thang ïa ki. Hadien kane u la thang sa ïa ka ïing, kaba ma u bad ka kurim lem bad ki khun ki ïa shong ïa sah.
Ki bahaïing hasem ka kurim, ki la leit ban ujor da ka ejahar sha ki Pulit halor kane ka jingjia. Ïa une u briew la ïalam tian bishar hakhmat ka ïingkashari kaba la hukum ban set ïa u hapoh ka Judicial Custody.
