Shillong, Naiwieng, 08: Ka kynhun Pulit Anti Narcotics Task Force (ANTF) East Khasi Hills kaba la ïoh jingtip kaba bniah mar mar ka la pynlong ïa ka jingkhynra ha kawei ka ‘slum’ ha Sweeper Lane bad ïohkem ïa kawei ka kynthei kaba la 26 snem ka rta.
Ha ka jingkhynra ïa ka ing sah jong kane ka kynthei, ki Pulit ki la ïoh ban kurup 92 tylli ki tyndong ba la thep ïa u drok heroin uba khia 99.21 gram, 51 tylli ki tyndong ba thylli, 13 tylli ki synduk sabon ban thep ïa u drok, kawei ka mobile phone, bad kawei ka Aadhar Card.
U Superintendent of Police, (City) ka East Khasi Hills, Bah Vivek Syiem ha u kyrwoh ba la phah sha ki lad pathai khubor u la ïathuh ba kane ka nongkhaii drok ka dei kajuh ka briew kaba la paw ha ka video ha GS Road hajan Bimola kaba la saphriang ha ka rynsan Social Media bad kaba la pynsngewkhia haduh katta katta ïa kiba bun balang ïa ka jingdie pylleiñ pylleiñ ïa u drok.
“Ka jingthwet ban ïohkem ïa kiwei pat kiba donkti ban die ïa u drok ha kane jaka ka dang ïai bteng. Ha kaba ïadei bad kane, ïa ka case la rejistar ha Shillong Sadar Police Station hapoh ki kyndon jong ka NDPS Act,” la ïathuh u SP (City).
