Shillong, Naiwieng, 08: Ki Special Cell jong ka tnat Pulit ka East Khasi Hills District ha ka Lah Sngi u Blei kiba la pynlong ka jingpynap shrip ki la ïohkem ïa ki lai ngut ki snar nonglute na ka kynhun ‘Gang’ kiba donkti ban rahbor ïa u nongñiah trok.
U Superintendent of Police (City) East Khasi Hills District Bah Vivek Syiem ha u kyrwoh ba la phah sha ki lad pathai u la ïathuh, hadien ba ki Pulit ki la ïoh jingtip ba ka don kawei ka kynhun ‘Gang” kaba pynbiej ïa uwei u nongñiah trok bad pynbor ïa ki trai ban thied ïa u jhur ha ka dor kaba tad. U SP u la ïathuh ba kane ka kynhun ki snar lute ka la ïalam ïa u nongñiah trok shajan ISBT ne Umïam na ka bynta ban leit kit ïa u jhur. Hynrei, kane ka kynhun Gang ka la rahbor pynban ïa u nongñiah trok sha kawei ka jaka khlaw bad pynbor ïa u nongñiah trok ban pyntip sha u trai baladep kit ïa u jhur bad ban phah ïa ka pisa lyngba ka Google pay ban siew sha ki nongdie jhur kiba dei pynban ki nongrahbor.
U SP (City) u la ong, da ka jingïarap jong ki dkhot ka Meghalaya Traders Fresh Vegetable & Ginger Association (MTFVGA) bad ka Khasi Jaiñtia Fresh Vegetable Suppliers Association (KJGVSA) ki Pulit ka Special Cell ka East Khasi Hills ki la pynlong ka jingkhynra ha ka 6 tarik mynta u bnai bad mar mar ki la ïoh ban kem ïa ki lai ngut ki briew na surok Mawlai By-Pass hadien ba ki la kit ïa u nongñiah trok na Lad Smit bad pynbor ïa u ban pyntip sha u trai lyngba ka telephone ba un siew ïa ka pisa.
Kane ka kynhun ‘Gang’ ka la leh ïa kane kajuh ka kam runar la bun bun sien ha kaba la bthah ban ujor ejahar bad ban rejister ïa ka ejahar, la ïathuh u SP.
Ki Pulit ka Special Cell ki dang pynlong ïa ka jingthwet kaba jur ïa kiwei pat ki dkhot jong kane ka kynhun ki nonglue kiba dang phet rieh ban lait na ka kti ki Pulit.
Ki Pulit ki la ïoh kurup saw tylli ki mobile phone bad kawei ka kali Maruti Swift Dzire ba la pyndonkam da ki lai ngut ki snar nonglute.
U SP (City) u la pyntip ruh ba ym pat lah ban tip la kine ki lai ngut ki don kti neem ha kiwei kiwei ki kam runar.
Ki Pulit ki la register case ha Madanrting Police Station hapoh ka Sectin 419/420/511/364A/384/340/34 Indian Penal Code (IPC) bad ka jingtohkit ka dang ïaid shakhmat.
