Pynrem jur u MLA ka North Shillong ïa kiba die drok ha surok hajan Sweeper’s Line

Shillong, Naiwieng, 08: U MLA jong ka North Shillong Constituency u Bah Adelbert Nongrum ha ka sngi Balang u la pynpaw ka jingpyrshah bad pynrem jur ïa ki briew kiba donkti ban die pylleiñ pylleiñ ïa u drok hajan ka Sweeper’s Lane mar pyrshah ka Bhutia Market ha ka Lah Sngi u Blei ïa kaba la ïoh ban ring video da ki nongleit nongwan bad pynsaphriang ha ka rynsan Social Media.
“Nga pynpaw ïa ka jingpyrshah bad ka jingpynrem halor ka jingjia ha ka 6 tarik, Naiwieng 2023 halor ka jiingïadie ïathied ha kaba ïadei bad u drok haba shit haba shai la kum ba die kwai die sikret khlem don jingtieng ne burom shuh ha ka jaka kaba don mar pyrshah ïa ka Bhutia Market hajan Sweeper’s Line ha kaba nga ngeit ba baroh ngi la ïohi ba ka la saphriang ha ki Social Media bad kane kan long ka thma pyrshah ïa u drok,” ong u Bah Adelbert ha u kyrwoh ba la phah sha ki lad pathai khubor.
“Nga ai ka jingïaroh ïa ki briew jong ka aiñ kiba la pyrshang ban trei shitom na ka por sha ka por bad ngi sakhi ïa ka jingïoh kurup ïa kine ki jingdih buaid na ki kali paidbah, na ki kali Sorkar ka ban wanlam ka jingduh jingshahniah balei ki jia kumne,” u la ong.
“Ka Sorkar ka dei ban shim kyrkieh ïa ka jingkit khlieh kumno ban pynkhlaiñ ïa ka tnat Pulit bad ban pyntreikam da ka buit thymmai ban phong da ki riam ki ban nym pynithuh ïalade ba ki dei ki briew jong ka aiñ (plain clothes) bad ban pynkhlain ïa ka jingïaid syntiat (patrolling),” la ai jingmut u Bah Nongrum.
“Ka Sorkar ka dei ban shim kyrkieh kloi kloi ban pynkhlaiñ ïa ka Narcotic Act kaba long synjor kumba long mynta. Haoid khlem pep kan dei ka jingïatreilang na baroh ki liang, hynrei ka Sorkar kum ka Kmie ka dei ban pyntreikam pyrkhing ban khanglad ïa ka jingwan rung laitluid jong kine ki jingsniew sha kane ka jylla ka jong ngi,” u la bynrap.
“Kan long lehnohei bad sepei lada ngi trei borbah napoh hynrei ka jingpyrkhing pat kam don ki jingsniew kin nang ïoh ban rung laitluid kum ban pynkynmaw ha ki por jong ka Covid-19 ladon ka jingpyrkhing ïa ki briew baroh shuwa ban rung sha ki jylla ban hap ban pyndep shuwa ïa ki kyndon ha Byrnihat Entry Check–Gate bad lada ka Sorkar ka don ïa ka jingkitkhlieh ïa la ka jong ka jylla bad khamtam ka jingieid ïa ki khun samla kan pyntreikam kumjuh na ka Entry Check-Gate Byrnihat, lym kumta kane ruh kan long kum kawei pat ka khlam ka ban ym lah ban ïoh ïa ka dawai ban pynkhiah,” u la ong.
“Lyngba kane nga ngeit ba ngin lah ban pynduna, ngin lah ban tehlakam bad ban pynsangeh (reduce, control & stop), namar kumba ka long mynta ka jingkhaii bad ka jingdawa ka long laitluid,” la bynrap u Bah Nongrum.