16 tarik yn khot ïakren ka Sorkar ïa ki Harijan halor ka jingpynkynriah na Them ïew Mawlong

Shillong, Naiwieng 08 : Ka Sorkar Jylla ka la rai ban khot ïa ka Harijan Panchayat Committee (HPC) ban ïakren pynbeit khatduh noh ha ka 16 tarik Naiwieng 2023 halor ka jingpyn-khreh ban pynkynriah noh ïa ki na Them ïew Mawlong.
ïa kane la pyntip da ka Sorkar Jylla hapoh ka ïingka bishar High Court jong ka jylla kaba shong bishar ïa kane ka mukotduma mynta ka sngi Balang.
Ha ka hukum, ka Division Bench ba kynthup ïa u Justice W Diengdoh bad Justice B Bhattacharjee ka la ong ba u AG ula pyntip ba ka jingtyrwa ka la wan na ka Sorkar Jylla ba kan khot ïa ka HPC sha ka jingïalang khnang ban lah pynbeit noh shisyndon ïa ki katto katne ki mat jingdawa lane kino kino ki kam ba sahteng hapdeng ki arliang mamla.
Halor kane, u AG ula pyntip ba ïa kane ka jingïalang la tyrwa ban pynlong ha ka 15 tarik ne 16 tarik u Naiwieng, 2023. Hynrei, ula pyntip ruh ba lada ka HPC ka pynpaw ba kan ym lah ban wan sha ka jingïalang ha kine ki sngi, ka lah ban tyrwa ïa kiwei pat ki sngi khnang ban ailad ïa ki kynhun manla ba kin ïashong bad ïapynbeit noh ïa ki kam baroh.
Ka ïing bishar ka la ong ba ïa mynta, kan ym pynïaid shuh shakhmat ïa ka mukotduma hynrei kan ap ïa ki arliang manla ba kin ïakynduh kumba ki la tyrwa.
“ïa ka jingmih na kane ka jingïalang dei ban pyntip bad wanrah hakhmat ka ïing bishar ha ka dur jong ka kaiphod. Namar kata, buh ïa kane ka kam ban shong bishar biang ha ka taiew ba nyngkong u Nohprah, 2023” ka la bynrap.
Ha ka 29 tarik Nailar, ka Sorkar Meghalaya ka la pyntip ïa ka ïing bishar ba ka la mynjur ban nang pynbun ïa ka jingai jaka ban shna ïing kumba la kyrpad da ki longïing kiba sah ha Them Metor.
Lah ban kdew hangne ba ka Sorkar ha ka blueprint ka la tyrwa ban pynkynriah ïa ki 342 tylli ki longïing ka Them Metor sha ka jaka jong ka Shillong Municipal Board.