Dei ba ïakhun ka KHADC ha u 2016 sa ïoh bor biang ki nongïalam shnong haduh mynta, pynkynmaw u CEM

Shillong, Naiwieng 08 : U Chief Executive Member (CEM) ka KHADC, Bah Pynïaid Sing Syiem ha ka sngi Balang u la pynkynmaw ba dei ka District Council kaba ïakhun borbah ban pynïoh biang ïa ka bor jong ki Rangbah Shnong hadien ba ki la shah sloit noh ka iktiar jong ki ha ki khyndiat snem ba la dep.
Ïa kane, u CEM u la kren ha ka jingïalang pynkup burom ïa u Bah Mawkordor Nongneng, Rangbah Shnong ka Mawklot ha ka jingrakhe dap 25 snem ka jingshakri kaba khlem shongthait ïa kane ka shnong kaba don ha ki thain Upper Shillong.
“Peit ha uto u snem ba shah sloit ka iktiar ki nongïalam shnong, dei ka KHADC ha u 2016 ba ïakhun ha Supreme Court ban pynïoh biang ïa ka bor jong ki. Lada ym don ka District Council, katta ym don shuh ka synshar shnong synshar hima bad ka Jaidbynriew ruh kan duh shisien ba ym don shuh ka synshar shnong synshar hima,” u la bynrap biang.
Nalorkata, u CEM u la pyntip ruh ba ka Jaidbynriew kaba don mynta tang 15 bad 16lak ka don hapdeng ka jingma lada ym don ki ain ban ïada kyrpang kumba don mynta ka jingïada lyngba ka Khyrnit kaba Hynriew jong ka Riti Synshar ka Ri lyngba ki District Council.
“Ka District Council kadei ka nongïada ïa ki riti dustur tynrai bad kumta nga kyntu ïaki paidbah ban ai ka jingïatreilang bad ki shnong, ki raid bad ki Hima ryngkat bad ka District Council ban pynkhlain shuh shuh ïa ka jingshakri nangne shakhmat.”
U CEM u la ong ruh ba u sngewkmen haduh katta katta namar kadei ka sien kaba nyngkong ïa u kum u khliehduh ka Council ban ïoh don bynta lang ha ka jingrakhe dap 25 snem jong uno uno u Rangbah Shnong ha ka kam shakri paidbah. Na ka liang ka Council ka la pynkup burom kyrpang ruh ïa u Bah Mawkordor ha katei ka sngi.
Haba bynrap lang, u Paiem Ainam, Syiem ka Hima Mylliem kum u Symbud Kongsan u la ong ba na ka Hima ki dap da ka jingkmen namar ka shnong Mawklot kadei ka shnong kaba ïaid beit ïaid ryntih bad ka bym ju don kano kano ka kynrum kynram.
“Ki Dorbar Shnong ki dei ki païa jong ka shnong bad ki dei ruh ki païa ba skhem jong ka Jaidbynriew baroh kawei. Kumta ngi sngew sarong ba don ki nongïalam shnong kiba aiti met ban mynsiem ban shakri ïa ka shnong ka thaw kum maphi,” u la ong.
Hadien kane, u Paiem Ainam u la aiti ruh ïa ka Sanad sha u Bah Mawkordor kum ka jingpynkupbor ban bteng ïa ka kam nongïalam shnong nangne shakhmat.
Na ka liang u Secretary ka Synjuk ka Bri u Hynñiewtrep (SNSBH), Bah RL Blah u la pynkynmaw bïang ïa ka jingjia ha ki khyndiat snem mynshwa ha kaba ki paidbah ryngkat ki nongïalam shnong ki hap ban mih da ki lak ngut halor ka jingshah sloit noh ka iktiar jong ki rangbah shnong.
“Hynrei dei ka jingïatreilang bad ka KHADC ba la leit sha Supreme Court bad hadien kane ki Rangbah Shnong bad ki Dorbar Shnong ki la lah pat ban treikam biang kumne kumba ka long mynta,” u la ong.
Shuh shuh u ong ruh ba ki Dorbar Shnong ki dei ki kynroh ban ïada ïa ka Jaidbynriew bad khlem ki Rangbah Shnong bad Dorbar Shnong ka Jaidbynriew kan laitlan. Ha kajuh ka por u la pynpaw ruh ba u Rangbah Shnong Mawklot u dei u dkhot ba radbah ha ka Synjuk uba la don bynta naduh ba seng ïa ka.
Ka Dorbar Shnong ha kane ka sngi ka la pynkup burom lang ruh ïa u Rangbah Dong ka Sohtyngab, Bah Heron Thawmuit uba la kynjoh 25snem ka jingshakri kum u Rangbah Dong ha katei ka shnong ryngkat bad u Bah Mawkordor.
Ka la don ruh ka jingpynkup burom ïa i samla Felisha Kurkalang iba la ïoh 6th Position ha ka SSLC 2023 bad kumjuh ruh ïa ki nongïalehkai kiba la mihkhmat ïa ka jylla ha ki jingïakhun bapher bapher.
Ha kane ka sngi la donlang ruh u Chief Adviser jong u Myntri Rangbah ka jylla, Bah Hamletson Dohling, Myntri MB Kharlukhi ka Hima Mylliem, Project Director ka DRDA, Bah PT Passah, ki Bakhraw na ka Raid, ki Nongïalam Shnong na ka thain Upper Shillong bad ki paidbah nongshong shnong.
La pynphuh shuh shuh ïa ka jingïalang da ka jingrwai bad jingshad na ka Seng Samla bad ruh ka jingphawar na ka Lasyrdoh Group.