ïai buddien ka Sorkar MDA na ka Sorkar Pdeng ban pynrung ktien Khasi bad Garo ha Khyrnit Baphra
Shillong, Naiwieng 8 : U Myntri sorkar u Marcuise N Marak mynta ka sngi u la ong ba ka sorkar Meghalaya Democratic Alliance hapoh ka jingïalam u Myntri Rangbah u Conrad K Sangma ka la ïai bud dien lynter bad ka sorkar pdeng halor ka jingpynrung ïa ka ktien Khasi bad Garo ha ka Khyrnit ba phra jongka Riti Synshar ka ri.
“ U Myntri Rangbah ula shim khia bha ïa kane ka kam. Wat u Secretary (Home) ka sorkar pdeng ruh u ju kren ïa kane man ba u Myntri Rangbah u wan sha Delhi namar u leit ïa kynduh beit ban kylli bad bud dien ïa kane ka kam. U Myntri Rangbah u la ïai ban jur bad ïai tynruh sha Delhi da kaba u la leit ïa kynduh ruh ïa u Myntri Kam Pohïing ka ri u Amit Shah na ka por sha ka por halor kane ka juh ka kam” ong u Marak.
U Marak uba dei u myntri ka tnad PHE u dei ruh uwei na ki dkhot jongka kynhun ba la ïalam da ka MP ka NPP na Tura ka Agatha K Sangma bad u Lamphang u Thomas A Sangma kiba la leit ïa kynduh ïa ki heh ka tnad kam pohïing ka ri ban ïakren na ka bynta ban pynrung ïa ka ktien Garo ha kane kajuh ka Khyrnit. Ha katei ka jingleit Delhi la ïadon lang ruh ka Achik Literature Society (ALS).
U la ïathuh ba u Joint Secretaryka MHA u la ïathuh ïa ki ba ka ktien Garo ruh ka la rung ha ka list jong ki 38 tylli ki jait ktien kiba dang ap ban ïoh jingithuh bad ïoh rung ha ka Khyrnit ba Phra.
“ Ka MHA kam ju weng lane pynduh pyndam ïa kano kano ka jait ktien kaba la dawa ban ïoh rung ha ka Khyrnit ba Phra. U Joint Secretary u la kular ruh ban phah ïa ka shithi ban pynthikna ba ka ktien Garo ka la don ha ka list ba ap ban ïoh jingithuh ban rung ha ka Khyrnit ba Phra. ïa kane ka shithi yn sa pynpoi sha u Myntri Rangbah bad ka ALS.
U la ïathuh ïa ka rai halor kane ka kam yn sa shim da ka sorkar pdeng. U la ïathuh ba ki la pyrshang ruh ban ïoh ïa kynduh ïa u myntri kam pohïing u Amit Shah hynrei kim ïoh lad satia namar u bunkam palat bad ba u dang don shabar ri.
U la ong namar ba ïa kine ki jingkulmar jingmut la lah ban pynthikna mynta ba ka ktien Garo ruh ka don ha ka list ban ïoh jingithuh kumta mynta yn ïa treilang ban ïoh pynrung baroh ar ki jait ktien kata Khasi bad Garo ha ka khyrnit ba phra.