Shillong, Naiwieng, 08: Ka Meghalaya State Commission for Women (MCSW) ha ka sngi Balang ka la pyntip ba ka la pan ïa ka kaiphod tohkit na ki Pulit ka Laban Police Station halor ka jingdung pynmynsaw jong u Suresh Singh ïa la ka jong ka kurim ka Poonam Singh ha ka 31 tarik u Risaw, 2023 ha iing sah ha Laban, kaba la mynsaw jur bad kaba dang shah sumar haduh mynta ha Hospital.
Ha u kyrwoh ba la phah sha u Mawphor, ka Commission ka la pyntip ba ka la shimkhia halor kane ka jingjia.
“Ha kum kane ka por, ngi sngew ba ka aiñ ka dei ban long kaba kham halor. Ka aiñ ka dei ban long halor ïa baroh,” ong ka Commission.
“Ka Commission ka la ïakynduh ïa ka lanot, ïa ka khun, bad ïa ki bor pynïaid jong ka Civil Hospital. Watla ka lanot (Poonam Singh) kam pat ujor eiei sha ka Commission ha kaba ïadei bad kane ka jingjia, hynrei ka Commission ka la pan ïa ka kaiphod tohkit na ki Pulit na ka Police Station ba dei peit bad mynta ngi dang ap ïa ka kaiphod shwa ban tuklar halor kane ka kam,”la bynrap ka Commission.
