Shillong, Naiwieng, 03: Ki shipai BSF Meghalaya ha ka sngi Saitjaiñ ki la ïoh khang kdong ïa ki arngut ki nong India bad ar tylli ki kali Mahindra Bolero pick-up ba kit shini hajan ka jingkieng Hangaria ha surok Hangaria-Huroi, East Jaiñtia Hills, Meghalaya.
Hadien ka jingïoh jingtip kaba bniah ba ki don ar tylli ki kali Bolero pick-up kiba kit shini kiba ieng kumba 1 kilomitar ka jingjngai na jingkieng Hangaria, ki shipai BSF ki la pynlong ka jingïaid pahara bad lap ïa kine ki ar tylli ki kali kiba don ïa u nombar ML-04D-2343 bad ML-04D-6828. Tang shu ïohi ïa ki shipai BSF, ki arngut ki nongñiah kali ki la phet krad ban shim kabu ïa ka jingdum jong ka miet hynrei ki shipai kiba la kthong ki la ïohkem ïa kine ki arngut.
Ha ka jingtohkit, kine ki arngut ki la phla ba ïa ka shini la thmu ban khaii be-aiñ sha ka ri Bangladesh. Ka shini ka dei ka jong ki riewshimet na ka shnong Hangaria bad ïa ki kali la rejistar ha ka kyrteng jong ka Queendun Suting bad Ibannangroi Suting, kiba dei ki nongshong shnong jong ka shnong Nongbareh Lyntiara.
Ha kawei pat ka jingkhynra, ki shipai BSF Meghalaya ki la ïoh kurup ïa ki mar kiba shongdor palat 2 lak, ïa kiba la thmu ban khaii tuh sha Bangladesh.
Ïa kiba la shah kem bad ïa ki mar ba la kurup, la aiti noh sha ki bor ba dei peit ban leh katkum ka jingdonkam jong ka aiñ.
