Ha krem Mawmluh pyni nuksa ïa MAA ïa ka rukom pyllait im ïa ki lanot ba mynsaw krem

Shillong, Nohprah, 03: Ka kynhun kaba hynñiew jong ka Meghalaya Adventurers Assocation (MAA) ka la pynlong ïa ka jingai jinghikai kaba shi sngi ha krem Mawmluh ha ka 12 tarik u bnai baladep.
Kane ka jingai jinghikai ka long hadien ba ki la ïoh ïa ka Certified Cave Single Rope Technique (SRT), Cave Leadership, bad ka jingshah hikai pyntbit kumno ban ïarap haba jia kino kino ki jingjia basngewsih hapoh krem kaba la long ha UK bad Ireland ha ki bnai Naitung-Nailar, 2023.
Namar ka jingrung krem ka la nang kiew katba nang mih ki sngi, ka MAA ka la pynpaw ba ym lah pat ban kiar lane ban ym shimkhia ha kaba ïadei bad kino kino ki jingjia bad ki aksiden. Ki jingjia basngewsih ki lah ban wan jia ha kano ma kano ka por.
“Ka Association da ka jingkitkhlieh kaba khraw ka la peit ngor bha ïa kine kine ki kam khnang ban pynthikna ba kin ym don ki jingjia ba sngewsih. Da kaba buh jingmut, ka Association ka la pynkhreh bha ïalade lada wan lynshop kum kine ki jingjia. Namarkata, ka long kaba kongsan ban pynlong ïa ka Cave Rescue Mock Drill kaba long ka jingkilan met kaba nyngkong eh ha ka ri India,” ong u General Secretary ka MAA u Bah Brian D. Kharpran Daly
Ha kane ka jingai jinghikai, 20 ngut ki dkhot jong ka MAA ryngkat bad u Robin Sheen ki la poi ha karkhana pynmih dewbilat ha Mawmluh ha ka por 10 baje mynstep. La pyntip ba ki don ar tylli ki jingjia da u Overground Controller bad ka jingrung shapoh ka krem ka la sdang ha ka por 10:15 baje mynstep.
Ka Search & Rescue Team (S&RT) ryngkat bad ki tiar ki la rung sha krem ha ka por 11:00 baje mynstep bad pynkut ïa kane jingai jingïarap ha ka por 2:00 ha ka jingïakhun kaba la neh haduh 5 kynta.
Ïa kane ka jingai jinghikai la lamkhmat da u Robin Sheen, uba long u dkhot jong ka Irish Cave Rescue Organisation, Ireland, uba la pynpaw ïa ka jingkmen ban ïohi ïa ka jingtbit jong ki 21 ngut ki dkhot kiba la ïashim bynta ha kane ka jingpyllait im hapoh ka krem kaba long kum shi bynta ka jingai jinghikai.