Haduh 50 klur donkam ka JHADC ban siew lut ïa ka tulop ba 8 bnai ki nongtrei

New Delhi, Nohprah 03 : Ka Jaintia Hills Autonomous District Council (JHADC) kaba don mynta hapdeng ka jingtyrkhong pisa ka donkam kumba 50 klur tyngka na ka bynta ban siew lut ïa ka tulop ba khlem siew sha ki nongtrei mynta la phra bnai.
Na ka liang u CEM ka JHADC, Bah Thombor Shiwat u la ong ba ka Executive Committee ka pyrshang borbah na ka bynta ban wad ïa ki lad ki lynti ban ïoh siew lut noh ïa katei ka tulop ba sahteng sha ki nongtrei ka council.
Katkum ka jingong jong u, tang ka tulop ka poi beit kumba 6 klur ha ka shibnai kynthup lang ïa ka penshon. “Lada ka sorkar jylla ka ai ïangi 50 klur tyngka, ngi lah ban siew dep lut ïa ka tulop barim jong baroh ki nongtrei,” u la ong.
Utei u heh ka JHADC u la ong ruh ba ka Council haduh mynta kam pat ïoh pdiang ïa ka khajna kaba dei ban ïoh na ki marpoh khyndew kumba ka ju ïoh na ka sorkar.
“La pyntip ïangi ba ka sorkar ka la thmu ban pyllait noh ïa ka bhah kaba sahteng jong ki kaba la kot sha ka 36 klur tyngka,” u la ong.
Halor ka jingkylli, u CEM u la ïathuh ba ka Council ka ïoh ïa ka khajna na ki kali kaba long kumba 3 klur man ka lai bnai. Tangba u ong ba ka jingeh kaba ki shem bad kynduh haba ïadei bad ka khajna kadei namar bun ki trai kali na rilum Jaintia ki leit ban rejistar ïa ki kali ha ophis u DTO ka East Khasi Hills.