New Delhi, Nohprah 03 : Ka United Democratic Party (UDP) ka lah ban pynbna noh mynta u bnai ïa ki kyrtong na bynta ka elekshon MP kaban sa long noh shen ha u snem ban wan.
Ban ïoh ïa u kyrtong ba baroh ki nongïalam ka party ki monlang, na ka liang ka party ka dang syllok bad ki nongïalam jong ka UDP na kylleng ka rilum Khasi ban jied uwei uba biang tam ban aireng ha kane ka elekshon napdeng u President barim ka HYC Bah Robertjune Kharjahrin, nangta u President ka Khasi Authors Society Dr. DRL Nonglait bad ruh u MLA barim ka Mawlai Bah PT Sawkmie.
Ka party shen kan sa phah noh ïa ka kaiphod sha ka state election committee kaban sa shim pat ïa ka rai ban jied ïa u kyrtong na bynta ka Shillong Parliamentary seat kumjuh ruh na bynta ka Tura seat.
Haba ïa kren bad u General Secretary ka UDP, Dr. Jemino Mawthoh u la ong ba ka jingïakren mynta bad ki nongïalam ka party ka dang ïaid bad la khmih lynti ba kane ka kam kan dep ha ka taiew ban wan.
“Ïa ka report kaba ïoh na ki nongïalam jong ki nongïalam party na ki distrik bapher bapher yn sa phah sha ka state election committee. Ïa mynta hi ngim pat lah satia ban ong ei ei namar ka SEC kan hap ban bishar bniah shwa bad ka shong mynta ha ka rai jong ki nongïalam ka party,” u la ong.
Shuh shuh u ong ruh ba ka party kan pynbna noh mynta u bnai hi ïa ki kyrtong kiban aireng ha kane ka elekshon sha Lok Sabha.
Ka UDP hadien ba ka la ïoh ïa ka report na ki nongïalam bapher bapher kan sa shong syllok pat bad ki nongïalam ka HSPDP hapoh ka lama jong ka Regional Democratic Alliance (RDA) kaban sa long shen.
