Nalor ba plie ïa ki kam pynroi, pynlong ka DS da ka jingpynkhuid Shnong paidbah ha ka shnong Nongpoh

Nongpoh, Nohprah 03: Ka Dorbar Shnong Nongppoh Proper ha ka sngi Saitjaiñ ka la lah ban pynlong da ka jingïapynkhuid shnong paidbah ba la shim bynta da baroh ki nongshong shnong, kaba long shi bynta ban wan rah ïa ka khuid ka suba bad ruh ban ai jinghikai sha ki paidbah nongshong shnong ba kin doh lang kata ka jingkitkhlieh ban wan rah ïa ka khuid ka suba hapoh ka shnong ka thaw.
Ha katei ka sngi shuwa ban pynlong ïa ka jingpynkhuid shnong paidbah la pynlong ruh ïa ka jingïalang plie ïa kane ka jingïapynkhuid shnong ba la wan ban plie paidbah da u MLA ka Nongpoh, u Bah Mayral Born Syiem kum u kongsan bad u MDC ka Nongpoh, u Bah Balajied Rani kum u symbut kongsan ryngka jingdon lang u Lyngdoh ka Raid Nongpoh, u Bah Linus Lyngdoh, u rangbah Shnong ka Nongpoh, u Bah S. Mynsong, kiwei kiwei ki riew rangbah bad ki paidbah nongshong shnong ka Nongpoh.
Kane ka sngi pynkhuid shnong ka long ruh ka sngi kaba ai jingkmen ïa ki paidbah nongshong shnong, ha kaba lyngba ka scheme SRWP, la lah ban plie paidbah ruh ïa ka ophis treikam ka Head Mistress ka Nomiwel Secondary School bad ka ophis ka Dorbar Shnong ba la wan plie hi da u Bah Mayral Born Syiem kum u MLA ka thaiñ ba la tei lyngba katei ka skhim ba la wan rah da u MLA.
Na ka liang u MLA, u Bah Mayral Born Syiem bad u MDC, u Bah Balajied Rani ha kane ka sngi ki la ai ruh ka jingkren ban ai mynsiem ïa ka Dorbar Shnong Nongpoh, ba kum ka Dorbar kan dang lah ban wan rah ïa ka khuid ka suba hapoh ka shnong ka thaw bad kitei ki nongmihkhmat ki la pynpaw ruh da kaba ong ba kan wan kata ka khuid ka suba hapoh ka shnogn ka thaw donkam ruh ban don kata ka jingïatrei lang na ki paidbah nongshong shnong.
Kum ki nongmihkhmat paidbah ka Nongpoh Constituency, ki la pynpaw ruh ba ki don kata ka mynsiem jong ka jingsngewkmen haba ki paidbah nongshong shnong ki don ïa kata ka mynsiem jong ka jingïatrei lang na ka bynta ka khuid ka suba jong ka shnong ka thaw bad ruh ki la pynbud ruh da ki kyntien ba kan wan kata ka jingkylla hapoh ka shnong ka thaw la ka long ha ka khuid ka suba, ha ki kam pynroi ne ha ka bha ka miat ka dei hi tang da ka jingïatrei lang jong ki paidbah ryngkat ki nongïalam shnong bad ki nongmihkhmat paidbah.
Hadien kane ka jingïalang ban ai jinghikai halor ka khuid ka suba, la pynbut pat da ka jingïapynkhuid shnoing paidbah ba la shim bynta da baroh ki paidbah ha ki dong bapher bapher jong ka Shnong Nongpoh bad lyngba jong kane ka sngi ka jingmih ryntih ki paidbah ban ïa pynkhuid shnong ka la wan rah shisha ka jingkylla halor ka khuid ka suba hapoh kane ka Shnong Nongpoh.