Pynlong ka ophis u DHO ïa ka prokram ba ar sngi ban pyn-i ïa ki mar rep ha Nonghyllam

Mawkyrwat, Nohprah 03: Ka ophis jong u District Horticulture Officer (DHO), South West Khasi Hills District, Mawkyrwat, ha ka jingïatreilang ryngkat bad ka ophis ‘Agricultural Processed Food Products Export Development Authority’ (APEDA), Regional Office, Guwahati, ki la pynlong ïa ka program kaba ar-sngi halor ka phang, “New Dimension in Marketing of Specialty Produce of Meghalaya 2023” kata ha ka 27 bad 28 tarik u ‘Naiwieng, 2023 ha Nonghyllam Indoor Stadium, South West Khasi Hills District.
Ïa kane ka prokram la plie da u bah Pius Marweiñ, MLA/MDC jong ka Ranikor Konstitwensi, ryngkat bad u bah T. Lyngwa, IAS, Deputy Commissioner jong South West Khasi Hills District, ka kong Durga Sohtun, Director jong ka Horticulture, Meghalaya, u Dr. Ashraf Kamal, BDM, APEDA, Guwahati, lem bad kiwei kiwei de kiba ïa don bynta lang ha kane ka jingïalang.
Ha kane ka program, ka la don ka jingïakop pyni nam ïa ki mar rep kiba pher bapher ryngkat bad ka jinghikai bad jingïamir jingmut halor ki rukom rep kiba ai jingmyntoi na ka bynta ban pynïaid ïew ïa ki mar rep. Ha kane ka jingïalang, la don palat 100 ngut ki briew kiba seng kam lajong, ki SHGs bad ki nongrep jong ka FPC kiba la wan na kylleng ki jaka jong ka thaiñ.
U bah P. Marweiñ, MLA/MDC jong ka Ranikor Konstitwensi, haba ai jingkren u la kren halor ka jingdonkam ban pynithuh bad pynïaid ïew ïa ki mar rep na ka distrik bad khamtam na ka konstitwensi jong u. U la ïathuh ruh ba kum kine ki jait program kin ïarap ïa ki nongrep ba kin pynïasoh bad ki ïew ki hat na ka bynta ban die ïa ki mar rep.
U Ashraf Kamal na APEDA u la kren shaphang ka jinglong jingman halor ka jingshalan ïa ki mar rep jong ka jylla Meghalaya, ka jinglah ban pynïar shuh shuh ïa ka rukom shalan ïa ki mar na Meghalaya, khamtam eh ha kaba ïa dei bad ka South West Khasi Hills District, bad kumno ban shalan ha ka rukom kaba dei bad ruh ban ïoh jingïarap tyngka na ki skhim jong ka APEDA.
Ha kajuh ka por u la kren ruh halor ki rukom pyntrei kam ka APEDA ban pynïoh ïew ïa ki mar rep, kum ka Buyer Seller Meet, Reverse Buyer Seller Meet, Trade fair, Outreach programme, Product specific Capacity Building programme, bad kiwei kiwei de.
Ka kong Durga Sohtun, Director of Horticulture, bad kiwei kiwei ki nongkren ki la ban jur halor ka jingdonkam ban pynlong ïa ki program ban pynshai ïa ki paidbah jong ka thaiñ ba ki dei ban pynïar ïa ka jingmut jingpyrkhat jong ki halor ki rukom kumno ban pynkiew ïa ka jingpynmih ïa ki mar rep bad ka jingpynïaid ïew ruh ïa ki ha ka rukom kaba biang. Hadien ka prokram ka la don ruh ka jingsam ïa ki khusnam sha ki nongrep kiba la jop ha ka jingïakop pyn-i ïa ki mar rep jong ki kata kiba la wan ha ka kyrdan ba nyngkong, ba ar, ba lai bad kumjuh ruh kiba ïoh konsolation.