Halor ka jingshimkabu palat ki nongdie jingdie pynsgew ka KSU EJHDU ha u DC bad kyntu ïa ki bor district ban leit jurip
Khliehriat nohprah 03: Namar ka jingshim kabu palat ki nongdie jingdie, ka Khasi Students Union East Jaiñtia Hills District Unit, myn ha ka sngi thohdieng ka la leit ban pynsngew bad buh ruh da ka jingthoh hakhmat u Deputy Commissioner ka East Jaiñtia Hills District, na ka liang ka seng ka la ong ba ki la don katto katne tylli ki dukan khamtam ki dukan die mar bam kiba shim kabu bad die rem dor ïa ki mar kaba ym sgngew iahap shuh bad kaba la long beaiñ.
Na ka liang ka seng ka la pynsngew bad dawa ruh ba ki bor synshar district dei ban shim khia ba ki dei ban da leit ban jurip sha ki dukan kiba die palat ka dor, khamtam ki dukan die mar bam khnang ba ki ba die dukan kin nym shim kabu than ïa ki paidbah ka thaiñ, la ong ruh ba wat ïa ki ki mawser lane ki maw ban thew ha ki pylla ki dei ban ioh ïa ka registration lane ka muhor (seal) na ka tnat ba dei peit bad ruh ki dukan ki dei beit ban don ïa ki cash memo kiba don ïa ka trading licence number kaba biang, ka kyrteng dukan bad kumta ter ter khnang ban dup lah ban tehlakam ïa ka jingdie beaiñ ne die rem dor palat bad ruh ki dukan ki dei ban da buh ïa ki jingthoh ba shai ba pyni ïa ki dor jong ki mar (display board).
Kane ka jing bud dien jong ka seng ïa ki dukan kiba die rem dor, ka dei namar ba ka seng hi ka la ioh bun ki jingujor na ki paidbah ka thaiñ halor ka jingdie rem dor ki dukan ïa ki mar ki mata khamtam ki mar bam, ha kaba iadei bad kane, ka seng ka dawa ruh na u Deputy Commissioner ba dei ban buh ïa ka District Consumer Dispute Redressal Commission kaba katkum ka Consumer Protection Act 2019 bad ruh ban ai ki jingpynshai sha ki paidbah kaba dei ka Consumer Awareness Program.
La ong ba na ka liang u Deputy Commissioner, u la kular ha khmat ka seng ban shim khia ïa kane ka kam ban pynshitom da kaba tyngeh pyrshah ïa kito ki dukan kiba die palat ïa ka dor, kaba palat ia ka dor ba la buh, u la kular ruh ban bthah ïa baroh ki dukan rashon, ki dukan die mar bam kiba don hapoh u pud u sam jong ka East Jaiñtia Hills District ba ki hap ban buh ïa ki Display Board.