Shah kem 9 ngut ki dkhot ka HNYF ba kynnoh thaw jingkulmar ha Khyndai Lad

Shillong, Jymmang 09: Khyndai ngut ki dkhot ka Hynñiewtrep National Youth Front (HNYF) kiba dei na Umpling bad Nongrah ki la shah kem ha ki pulit ka Sadar Police Station ha ka step phyrngap jong ka sngi Ba-ar halor ka jingkynnoh ba ki thaw jingkulmar ha janmiet jong ka 4 tarik ha ki bynta ka Khyndai Lad ha kaba ki la pynpra ruh ïa ki katto katne tylli ki dukan.
Hadien ba ki pulit ki la kem ïa kine ki dkhot ka HNYF na ka liang ka seng ryngkat kiba ha ïing ha sem jong ki, ki la tur ban pan jingshai na ki pulit halor ki jingkem jong ki ïa kitei ki khyndai ngut.
Ha kane ka jingleit tur ki dkhot ka seng bad kiba ha ïing ha sem la ïohi ba ka don ka jingïania kaba jur bad ki pulit namar ka jingwan kem ïa kitei ki khyndai ngut dang step phyrngap bad khlem da ai kino kino ki jingkynjoh ktien shuwa sha ki bor synshar shnong.
La sakhi ba ha kane ka jingïania kaba jur hapdeng ki ar mamla ka la pynlong ïa uwei u pulit ophisar uba la tip kyrteng kum u Kamla Thapa ban tla da ka sih ha kane ka jingïania bad ki dkhot ka HNYF.
Ki kmie jong kine ki samla kiba shah kem ki la buh jingkylli halor ka jingwan khynra dang step phyrngap ki pulit kiba la kah dur bha khlem da wan ïalam ïa kino kino ki bor jong ka shnong.
“Ki kam be-aiñ aiu u la leh haduh ba dang step phyrngap phi la kem ïa ki na jynthiah, hato ka dei ka kam pynïap briew ne ka kam lute ne ki kam be-aiñ aiu haduh ba phim lah ap shuh ha ka jingshisha ngim pyrshah lada phi kem lada ki leh kam sniew hynrei ngi pyrshah ïa ki rukom wan kem jong phi,” ki la ong ïa ki pulit ha ka jingïania.
Na ka liang u Thapa haba pynphai nia u la ong ba ka jingkem ïa ki ka dei namar la don ki sabut kiba shai ha ka kam be-aiñ kat kum ka jingujor ejahar kawei ka kynthei kaba sah ha Khyndai Lad.
Haba kren sha ki lad pathai khubor kine na ka liang ki kmie jong kine ki samla ba shah kem ki la ïathuh ba kine ki pulit ba la da dur khmat bha ki shu wan ban kyrsiew beit na jynthiah ban rah marmar sha thnat.
Ki la ïathuh ruh ba na ka liang jong ki ki la pan jingshai ha kino ki kyndon la kem hynrei ‘ki shu jubab beit ba la suba ba ki leh kam sniew bad wat haduh mynta ba ngi wan shane ngim pat tip halor ki kyndon aiu la pynngat ïa ki khun jong ngi,’ ki la ong.
Na ka liang u President ka HNYF East Khasi Hills u Bah Bless Dkhar u la buh jingkylli ïa ka tnat pulit ka jylla ha kaba ïadei bad ka jingsting kti sting kjat ban kem tang shu mih kino kino ki ejahar pyrshah ïa ki samla Khasi, “Hato la ïoh kem mo ïa ki nonglute ïa u samla ba shah lute ha Mawiong, hato la kem mo ïa ki pulit Assam ba siat ïa ki Khasi ha Mukroh, bad hato la kem ïa ki BSF ba siat ïap ïa u Khasi ha Mawshun ka jubab kaba shai ka dei beit EM hynrei lada dei ïa ki Khasi tang da ki sekhon ki pulit ki la wan kem,” u la kynthoh.
“Kum ki dkhot ka seng ngin ïai trei na bynta ka jaidbynriew wat hapdeng ka jingshah pyntyrha ha kiba bun ki kyndon jong ka aiñ,” u la ong.