Hukum ka ïing bishar HC ïa ka sorkar ban sei madan ïa ki briew ba seng beaiñ ïa ki karkhana Coke

Shillong, Jymmang 9 : Ka ïing bishar High Court (HC) jongka jylla ka la hukum ïa ka sorkar ba kan sei madan ïa ki briew kiba don kti ban seng beaiñ ïa ki karkhana Coke ne karkhana thang dewiong ha ka jylla bad kiei ki lynti ba la shim ban pynshitom ïa ki.
“ ïa kane ka mukotduma yn bishar hadien sawtaiew bad la ai por ïaka sorkar jylla ban pyntip ïa ki briew kiba donkti ban seng ïa kine ki karkhana Coke beaiñ bad kumjuh ruh ban kdew kiei ki lad ki lynti ba la shim ban pynshitom ïa ki” ong ka ïing bishar ba pura ba la khlieh da u Chief Justice Sanjib Banerjee ha ka hukum ba la pynmih mynta ka sngi halor ka mukotduma PIL ba la ujor da u Shailendra Kumar Sharma.
“ U Justice Katakey ruh khlem artatien un pynthikna ba kine ki karkhana beaiñ ki la sangeh ban treikam kat haduh ka por ban bishar biang ïa kane ka mukotduma” ong ka hukum.
U K Khan Additional Advocate General u la kdew sha ka kaiphod ba khatar jong u Justice BP Katakey ha kaba ïadei bad ka kam tih bad khaïi beaiñ ïa u dewiong ha kaba kiba bun ki paragraph u la kdew ruh ïa ka jingdon ki karkhana thang dewiong beaiñ kiba khlem ïoh jingbit kiba la phah khang noh mynta.
La pyntip ba ki don haduh 57 tylli kine ki karkhana beaiñ kiba la khang dam bad ka jingpynkhreh ban khang ïa kiwei kiba khlem ïoh jingbit ruh ka dang ïaid shakhmat namar kim lah ruh ban ïathuh nangno ki ïoh ïa u dewiong.
Wat hadien ba ka ïing bishar ka la pynmih bun ki hukum hynrei ka jingkhaïi dewiong beaiñ ka ïai bteng beit naduh u snem 2016 wat hadien ba la khang da ka NGT bad ka ïing bishar Supreme Court ruh bad kane ka lah ban ïadon kti ka sorkar jylla ruh.
Ka ïing bishar ka la bishar bniah ruh ba wat hadien ba la bthah ïa ka sorkar jylla bad ïa u Chief Secretary ban pynthikna ba ka kam khaïi dewiong beaiñ ka dei ban sangeh noh hynrei kine ki karkhana beaiñ ki dang ïai mih tad haduh ba ka ïing bishar kan shim bishar hi da lade ba ïa kane kam tharai mynta la khang ne pynsangeh noh.
Ka pynlong ruh ïa ki nongshong shnong kiba don ka mynsiem ban pyntip sha ka ïing bishar halor ka jingmih kine ki karkhana coke beaiñ kum ki tit ha kylleng ka jylla katba ka sorkar pat ka khlem shim khia ban bud dien ne tohkit na ei u wan une u dewiong uba ki pyndonkam ha kine ki karkhana lane ban talasi la kine ki karkhana ki ïoh jingbit ne em.
Dei hadien ba la shim khia da ka ïing bishar ba ka sorkar ka sa pyrshang ban khang ïa kine ki karkhana beaiñ kiba ym dei hi ruh ban mih naduh kaba sdang ruh.
Haba la kylli da ka ïing bishar u nongïasaid u la kdew ïa ki lad ki lynti ba la shim da ka srokar ban khang lut ïa kine ki karkhana beaiñ.
Shuh shuh ka ïing bishar ka pynpaw mynta ka sorkar ka la pynbna ban sdang noh ïa ka jingtih dewiong kat kum ka stad saian. Hynrei mynshwa namar ka jingïadon kti bad kyrshan ïa ki briew kiba donkti ha ki kam tih bad khaïi dewiong beaiñ ka jingduh khajna ka long kaba shyrkhei bad bun ki mynsiem briew ki la iap ha ka jingtih dewiong liew khnai bad dei ruh na kata ka daw ba ka ïing bishar ka la pan da ki bor pahara na ka sorkar pdeng ban pynsangeh ïa kane ka kam beaiñ. Ka ïing bishar kan shong bishar biang halor kane ka mukotduma ha ka 8 tarik Jylliew.