Shillong, Lber 09: Ka Meghalaya Sport Climbing and Mountaineering Association (MeSCMA) ka sngew sarong ban pyntip ba u Teimiki Sungoh, na ka shnong Shangpung, West Jaintia Hills District, u la shah jied ban ïashimbynta ha ka ‘Search & Rescue Course’ ha Himalayan Mountaineering Institute (HMI), Darjeeling.
Kane ka prokram ai jinghikai ka la sdang naduh ka 06 tarik Lber bad kan bteng haduh ka 28 tarik mynta u Lber, 2025. ïa ka jingïaleit shimbynta jong u Teimiki Sungoh la kyrshan da ka tnad Sports jong ka Sorkar Jylla Meghalaya.
La pynrung ïa ka Search & Rescue Course kum ka prokam ai jinghikai kaba man ka por ha ki Mountaineering Institutes ba ju pynlong shisien shisnem. Ki nongshah pyntbit (Trainees) kiba la pyndep bad ïoh ïa ka kyrdan ‘A’ tang ha ka Advance Mountaineering Course ki lah ban ïoh ïa kane ka jinghikai.
Kane ka jinghikai ka kynthup ïa ki kam wad bad pyllait im (Search & Rescue) ha ki lum Himalaya da kaba pyndonkam ïa ki buit jingïarap ba kyrpang, la ka long ha ki jaka maw, jaka thah bad jaka thah tylli (snow & ice), ban pynpoi ïa ki dawai (First-aid), Mountain Navigation, Radio Telephony, ka jingïadei bad ki seng bapher bapher bad ka jingdon bynta jong ki ha ka por ba ki leit pynlait im, ki rukom pyntip khubor lyngba ka sur lane durkhih (Audio & Visual) bad ki rukom pynkynriah briew kiba kynthup ïa ka jingpyndonkam da ki helicopter.
Kane ka jinghikai ka long nyngkong eh ban ïarap ïa ki bor pynïaid jong ki District ki thaiñ jaka lum bad kiwei kiwei ki seng ban seng ïa la ki jong ki Search & Rescue Cell.
Kane ka long katkum ka kyrwoh na ka Kong Malviancy Shabong, President jong ka MeSCMA.
