Da 6 wiket pynliem ka Sunrise ïa ka Matrisanga ha ka SCA Cricket League First Division 2024-25

SHILLONG, Lber 09: Ka Sunrise CC ka la lah ban pynliem da 6 wiket ïa ka Matrisanga CC ha kawei na ki jingïalehkai ba la long ha ka sngi U Blei jong ka Shillong Cricket League First Division 2024-25, ba la pynïaid da ka Shillong Cricket Association ha madan Polo.
Hadien ba jop ïa ka jingkynting pisa (toss) ka Sunrise ka la aiti ïa ka Matrisangha ba kan tied nyngkong, ha kaba ka la lah ban pynkhyllem noh baroh 10 wiket jong ka Matrisangha tang na bynta 96 ron haki 25.4 ober. Dei tang u Suraj Chettri (34 ron naki 36 bol) bad u Pargat Singh Sohian (16 ron naki 39 bol) kiba la kham seisoh ha ka tied. Kiba kongsan ha ka bowling na bynta ka Sunrise ki long u Prince Thakur (khur 3/24 naki 7 ober) bad u Joydeep Ghosh (khur 3/28 naki 7 ober).
Haba wan ban beh ïa ka thong, ka Sunrise ka la pyndep tang hapoh ka 15.4 ober, da kaba kamai 101 ron bad hap tang 4 ngut ki nongtied ban pynthikna jop da 6 wiket ha kane ka jingïalehkai. U Sajan Maghaiya, rangkawang bol jong ka Matrisanga, u la khur 3/22 naki 4 ober.
U Bishnu Mahato u la long uba kongsan tam ha ka tied na bynta ka Sunrise, ha kaba u la lah ban kamai 44 ron naki 37 bol, katba u Krishna Chettri u la kyrshan da kaba kamai 24 ron naki 18 bol. ïa ka nam Player of The Match la khur da u Prince Thakur, uba la khur 3 wiket.