Shillong, Lber 31: Ka Meghalaya Sport Climbing & Mountaineering Association [MeSC&MA], ha ka sngi Nyngkong ka la pynbna ba u Keliostar Pdai bad u Balawanhabor Rynjah baroh arngut ki la don ha Darjeeling ban shim bynta ha ka prokram shah pyntbit ha ka ban kiew lum (mountaineering courses) ha Himalayan Mountaineering Institute.
U Keliostar Pdai, u pulit Constable jong ka 3rd Meghalaya Police Battalion, u la shah jied ban ïaid lyngba ka prokram Basic Mountaineering Course, katba u Balawanhabor Rynjah, u samla pule jong ka Sankardev College, un shim bynta ha ka Advance Mountaineering Course.
Kine ki prokram ai jinghikai kin sdang naduh ka 01 tarik ïaïong, 2025 (mynta ka sngi Hatmajai) bad kan kut ha ka 28 tarik ïaïong. ïa ka jingïashim bynta jong kine arngut la kyrshan da ka tnad ïalehkai jong ka sorkar Jylla Meghalaya.
Ka BMC ka dei ka jinghikai ba tynrai ha kaba yn sdang pyntbit ïa kiba shah hikai ha ki jaka ba kynjang, ha ki jaka maw bad thah, ka jingtip tynrai ïa ki jingthung jingtep kiba mih ha ki jaka lum, ka jingïaid kjat bad ka buit ban im.
Ka AMC ka ju neh 28 sngi bad la shna na ka bynta ki briew shimet kiba la pyndep ïa ka BMC ryngkat ka kyrdan Grade-A. Ka AMC ka thmu ban pyntbit ïa ki nongkiew lum ban long ki nongïalam bad ki dkhot kiba lah ban long ki nongïalam sha ki lum Himalaya bad ban pynmih ïa ki ‘nongkieng lum ba pawnam’, la ong ka MeSCMA ha ka kyrwoh sha ki pathai khubor.
