SHILLONG, Lber 31: Ka Sputnik CC ka la ïohrah ïa ka nam lahduh ha ka lympung kriket kaba la tip da ka Shillong Cricket League Super Division 2024-25, ba la pynïaid da ka Shillong Cricket Association [SCA], ha madan Polo. ïa kane la pynthikna hadien ba ka la pynliem noh da 3 wiket ïa ka Rangkynsai hynne ka sngi Nyngkong (31 tarik Lber, 2025).
Ka Sputnik ka la rah khatduh ïa ka nam ha u snem 2023, katba u snem 2024 ka la ïoh ïa ar tylli ki kynhun lahduh lane joint champion ha ka final hapdeng ka Rangkynsai bad ka Royal CC kaba la shah pynthut noh ha u slap kaba khlem ailad ïa ka jingïalehkai ban jam shakhmat.
Ka Rangkynsai ka la shah pyntied nyngkong hadien ba rem ha ka jingkynting pisa (toss) bad ka la lah ban kamai 217 ron shuwa ban khyllem baroh shiphew wiket haki 45 ober ba la mang, katba ka Sputnik ka la pyndep ïa ka kamram da kaba duh 7 wiket bad pynsah sa 7 tylli ki bol.
Ha ka inning kaba nyngkong na bynta ka Rangkynsai u Kishan Lyngdoh u la long uba kongsan, da kaba kamai 98 ron naki 91 bol, u la shah khanglad ban kynjoh ïa ka spah ron hadien ba u la shah pynhap noh ha ki kti jong u Md Nafees Siddique (1/40 haki 9 ober).
Tang arngut kiwei pat ki nongtied kiba la lah ban kynjoh ïa ka phew ron, kine ki kynthup ïa u Ram Gurung (29 ron na ki 61 bol) bad u Ajay Duhan (24 ron na ki 36 bol). U Swarajeet Das u la long uba seisoh tam napdeng ki rangkawang bol, ha kaba u la lah ban khur 3/35 ha ki 9 ober.
Ka Sputnik ka la pyndep ïa ka kamram ban kamai 220 ron da kaba khyllem 7 ngut ki nongtied haki 43.5 ober bad ban jop ïa ka jingïalehkai da 3 wiket. Ym shym la don uwei ruh u nongtied uba la tyngshaiñ na ka bynta ka Sputnik. Pynban, lai ngut ki la long kiba kongsan ban noh synñiang na bynta ka kynhun, ha kaba u Ashif Khan u la kamai 49 ron na ki 79 bol, u Gurinder Singh u la kamai 46 ron na ki 44 bol bad u Amiangshu Sen u la ïarap 45 ron na ki 80 bol.
U Swarajeet u la jied ban khur ïa ka khusnam Player of the Final, katba u Ajay u la ïoh ïa ka nam Player of the Tournament bad la aiti ïa ka khusnam lahduh sha ka Sputnik ryngkat ka khusnam pisa kaba T.40,000.
Ki riew rangbah kiba la donlang ha kane ka sngi ki kynthup ïa u President ka Meghalaya Cricket Association u Nababrata Bhattacharjee, u Secretary ba donburom jong ka MCA u Rayonald Kharkamni, Honorary Treasureru u Dhrubajyoti Thakuria bad ki dkhot ba la kham rangbah jong ka Shillong Cricket Association.
Kine ki arliang kiba la poi sha ka final ki la dep ïakynduh teng shisien mynta ka samoi namar ba baroh ar ki la shah pynrung ha ka thup jong ka Group B ha ka por ba dang ïaid ka jingïakhun jong ka round robin stage. Ka Rangkynsai ka la jop ïa katei ka jingïakhun hynrei kam shym la lah satia ban pynurlong biang ïa kaei kaba ka la leh kham mynshwa.
