SOHRA, Lber 31: Ka lympung ïalehkai kriket hapdeng ki ophis treikam ïa kaba la tip da ka ‘Inter Office Cum Corporate League T20 Cricket Tournament 2025’, ba la pynïaid da ka East Khasi Hills Cricket Association [EKHCA] ka la poi sha kaba kut ha kaba ka kynhun ïalehkai jong ka Ribhoi Office Combine ka la ïohrah ïa ka nam lahduh.
Kumban shu pynkynmaw, kane ka lympung ka la sdang naduh ka 10 tarik u Lber, 2025, bad la pynlong ha Madan Pynshadkhurai, Saitsohpen Sohra, ha kaba ki la don shiphew tylli ki kynhun ba ïashim bynta kiba la phiah ha ki ar tylli ki Group. Ha ka Group A ki kynhun ki long ka NIT Meghalaya, Telecom Combine, MLP Sohra, PHE Sohra Division bad ka Exporter XI, katba ha ka Group B, ki long ka Ri-Bhoi Office Combine, Sohra Post Office, Combine SHG, SSA Shella Bholaganj bad ka Sohra Labour Union.
Napdeng kitei ki shiphew tylli ki kynhun kiba poi sha ka final ki dei ka Ribhoi Office Combine bad ka Combine SHG, bad haba kyllumlang naduh ba sdang haduh ka final, kane ka lympung ka la sakhi ïa 23 tylli ki jingïalehkai.
Ha ka jingïakhun ïa ka final kaba la long ha ka sngi Nyngkong (31 tarik Lber, 2025), ka Ribhoi Office Combine ka la jop da 27 ron ban rah ïa ka burom lahduh.
Haba phai sha ka final, ka Ribhoi Office Combine ka la jop ïa ka jingkynting pisa (toss) bad jied ban tied nyngkong, ha kaba ka la lah ban kamai 177/9 haduh kaba kut jong ka 20 ober, u Kumar Sewa u la long uba kongsan tam ha ka tied da kaba lamkhmat 75 ron naki 49 bol. U Bryan Mac Millan Marbaniang u la khur 2/38 haki 4 ober.
Watla ka Combine SHG ka la lah ban tied pyndep ïa ka 20 ober ba la mang hynrei kam shym la poi satia sha ka thong ba ka donkam, da kaba kynjoh tang 150/7, bad na ka liang jong u Mebankyrshan Allyya u la kamai 35 ron naki 22 bol.
U Wansuklang Shullai u la tyngshaiñ ha ka bowling da kaba khur 3/21 naki 4 ober kaba la ïarap ïa ka Ribhoi Office Combine ban khur ïa ka jingjop da 27 ron bad kaba la pynïoh ruh ïa u ïa ka nam Player of the Match bad ha kajuh ka por ïa ka khusnam ‘Player of the Tournament’.
Ki riew rangbah kiba la don ryngkat ha kane ka final ki kynthup ïa u Additional Deputy Commissioner jong ka Ri-Bhoi, u Bah MB Tongper, nangta u Block Development Officer jong ka Shella Bholaganj – ka Adiel R Kynta, u Sordar Elaka jong ka Saitsohpen Sirdarship, u D Kynta lem bad ki dkhot nongkitkam ba la rangbah jong ka EKHCA.
