Mawkyrwat, Lber 31: U President jong ka Seng ki Nongshna Phlim ka Meghalaya Film Makers Association bad kumjuh uba bat kum u President jong ka Hill Farmers Union (HFU) jong ka Central Body, u bah Commander Shangpliang u la plie pyrda ïa ka jinglympung ïalehkai sport jong ki 3 tylli ki skul kaba ju pynlong shisien shisnem da ka Nongsynrieh School Sports Association (NSSA) ha ka Shnong Nongsynrieh, South West Khasi Hills District.
Kum u kongsan haba kren ha ka jingïalang u Bah Commander Shangpliang, u la ai mynsiem shikatdei ïa ki khynnah skul da kaba ong ba kim dei ban duh jingkyrmen ne duh mynsiem wat lada ki mih na ki longïing longsem kiba duna ha ka ïoh ka kot hynrei ki dei ban don beit ka mynsiem jong ka jingïakhun khnang ban poi sha ki kyrdan jong ka nam ka jingjop.
U la ong shuh shuh ba ka jingduk kam dei ban long u mawjynthut na ka bynta ki samla lada ki don ka jingkwah ban long ki doktor, ki engineer, ophisar bad kiwei kiwei, hynrei ka shongeh ha ka jingtrei shitom da lade da kaba pynlut kham bun ka por ban khreh kot bha da kaba u la ai nuksa ruh ïa lade ba kumno u trei shitom da kaba u leit bylla mynsngi mynsngi bad kyrshan skul ïa lade da kaba u leit skul mynstep.
Ïa ka jingïalang ha kane ka sngi la pynïaid da u babu Manskhem Mawlieh uba bat kum u President jong ka Nongsynrieh School Sports Association (NSSA) bad la kren ai khublei da u Babu Kyrshan Shangpliang uba dei u Secretary jong ka Nongsynrieh School Sports Association (NSSA).
