Plie ka kong RB Lyngwa ïa ka madan Futsal ha Saiden, ka rynsan kilan ban kiar na ka kyiad bad drok

By Mawphor Editor On Apr 1, 2025

Nongpoh, Lber 31: Ka Kong RB Lyngwa ryngkat bad ka iing ka sem mynta ka sngi kila lah ban plie paidbah syndon ïa kawei ka madan Futsal kaba la ai kyrteng kum ka ‘La Farbe Grace’ haka shnong Saiden, Ri-Bhoi District da ka jingangnud ban plielad ïaki samla ban ioh ka jaka kilan, ban lait naki jinglien ba sniew khamtam ki jingdih buaid kum ka kyiad bad u drok.
Ïa katei ka madan ïalehkai, la wan ban plie paidbah da u Rev DS Roy Muktieh kum u kongsan, haka jingdonlang u Bah EK Lapang Rangbah Shnong ka shnong Saiden, ka kong RB Lyngwa lem bad ki bahaiing hasem.
Kum ka iing ka sem baroh kawei kila pynpaw ruh ba hapdeng shibun ki jingeh jong ka jingïaid lynti, ban pyndep ïa katei ka madan, hynrei ka long pat ka jingkmen kaba khraw ba mynta ka sngi la lah ban plie paidbah syndon ïa katei ka madan watla ym pat lah ban pyndep lut nadong hadong, hynrei tang haki khyndiat taiiew ban wan yn pdiang noh ïa ki samla kiba kwah ban ïalehkai.
Naka liang u Rev DS Roy Muktieh kum u kongsan haba kren ha katei ka sngi u la pynpaw ka jingsngewkmen bad ai ka jingïaroh ïaka iing ka sem jong ka kong RB Lyngwa baroh kawei namar ka jingiohi jngai bad ka thong kaba ki don ban pynurlong ïa katei ka madan kaba long ka jingkyrkhu pat naka bynta ki samla ka dong bad ka thaiñ baroh kawei ban long kum ka rynsan kilan.
U la ong ruh ba ka iing ka sem jong ka kong RB Lyngwa ym tang ba ki shakri haka kam kaba ki trei hynrei ki dei ruh kiba mih shakhmat ban shakri ïaka imlang ka sahlang baroh kawei lyngba ki kam jong ki bad kane ka pyni lyngba jingthrang jong ki ban mih shakhmat ban ai rynsan ïaki samla ka dong bad ka thaiñ baroh kawei.
Naka liang u Bah EK Lapang kum u Rangbah Shnong ka shnong Saiden u la pynpaw ba um shym la mutdur ba katei ka madan kan urlong haka shnong Saiden bad kane kan dei ka kabu ïaki khun samla ban pyndonkam ïaka, ym ban pynlut por haki kam kai bad ki jingmlien ba sniew khamtam ka dih kyiad bad dih drok kaba la kynrei haki khun samla ha kine ki sngi ba mynta.