Shah jied ka Star Public School, Lumshnong kum kawei na ki shlem pule ba pyndonkam da ki kor ki bor

Khliehriat Lber 6 : Ka jingpyndonkam da ki kor ki bor ka juk mynta (technology) ha ki jaka pule, kum ha ki skul, ka dei kawei na ki rukom ai jinghikai ba thymmai, halor kane, ka skul CBSE, jong ka company Star Cement, ka Star Public School Lumshnong, ka la shah jied kum ka shlem ai jinghikai lane ka Pilot Institution , kaba la pyntrei-kam pura ia ka rukom ai jinghikai ia ki khynnah kaba tip kum ka Hybrid Learning, Digital Literacy and Skill Hub kaba da ki Microsoft, ha East Jaiñtia Hills District, kaba na ka liang ki nonghikai ruh ki la long kiba tbit bha ha kane ka rukom ai jinghikai.
U Principal jong katei ka skul, u Dilip Kumar, u la ïathuh ba baroh ki nonghikai jong katei ka skul, ki dei kiba la pyndep ïa ka jingshah hikai lane ka training ha kaba ïadei bad ka Hybrid Learning, Digital Literacy and Skill Hub Initiative bad la tip ruh ïa ki kum ki Microsoft Educators, kane ka jingpyntreikam pura ïa ki kor ki bor ha katei ka jaka pule ha East Jaiñtia Hills District, ka dei kaba katkum ka jingbthah (guideline) kaba hapoh ka Pradhan Mantri Kaushal Vikas Yojna, u la ong ruh ba ka Star Public School, ka don ka jingthmu bad ka thong ban pyndep ba kan sa ai jinghikai kum ki vocational training, ïa kiwei kiwei ki khynnah ruh kiba pule ha ki class IX haduh class XII bad kumjuh ruh ïa kito ki khynnah kiba la pep skul noh shiteng por.
“Halor ka jingkiew stet ka jingpyndonkam ki kor ki bor (technology) ha kiba bun ki liang, ka Digital Literacy ka la long kaba donkam bha ïa baroh ki briew naduh ki khynnah haduh ki rangbah, ka technology shisha ka long kaba donkam ban tip, ka ïarap ruh ha kiba bun ki kam kum ki kam pisa tyngka lane financial transaction bad kiwei kiwei ki kam bad ka ïarap shibun ruh ban lait na ki jingshah thok lane ka financial frauds, kaba la mih paw lyngba ki rynsan social media kaba la nang kiew na ka por sha ka por ka jingshah thoh bad shah shukor ki briew” ong u Dilip Kumar.
U la bynrap ruh ba kane ka Digital Literacy, ka kynthup ruh ïa kiwei kiwei ki jait software application kiba donkam, ba ki paid-bah ki dei ban tip bad sngewthuh kumno ban pyntreikam ïa kita ki software application , kum ki Microsoft Office lane ki Google Suite bad ki Multimedia Tools, kum ka Adobe Creative Suite, kiba dei ki application kiba donkam bha khamtam ha ki jaka trei.
Kane ka Digital literacy, ka ïarap ruh ba kyntiew ïa ki sap ki phong ha kaba ki riew don sap ki lah ban pynpaw pyrthei ha ki rukom ba thymmai lyngba ki online kumjuh ruh ban lum jingtip na kylleng.