Nongpoh, Lber 06: Ka Federation of Khasi Jaintia and Garo People, North Khasi Hills District haka jingïalam u Bah Luistar Lyngdoh President bad ki dkhot mynta ka sngi kala pdiang burom ïaki rangïalehkai phutbol ka jylla kiba la rem noh haka jingïakhun phainal pyrshah ïaka Karnataka haka lympung ïalehkai Santosh Trophy kaba la long ha Riyadh, Saudi Arabia haka 4 tarik mynta u bnai.Watla ka kynhun ka jylla kala rem noh haka phainal hadien ba kala shah pynliem noh haka Karnataka da 3-2, hynrei ka long ka jingsarong ïaka kynhun ïalehkai ka jylla Meghalaya baroh kawei halor ka jinglah jong ki rangïalehkai ban lehkai bha ban poi shaduh ka thup phainal jong katei ka lympung ïalehkai baheh haka ri.
Naka liang ka FKJGP kala pynkup ruh da ki jaiñ Ryndia ryngkat ki syntiew mar sien hiar ki rangïalehkai ha Jorabat kum ka dak ka jingsngew sarong ba kum ka kynhun ïalehkai ka jylla kala lah ban poi shaduh ka thup phainal ha katei ka lympung
Ïa ka kynhun ïalehkai ka jylla la synran lang ruh da ka KSU North Khasi Hills District bad ki Circle naduh Nongpoh ter ter shaduh Mawlai ba kin pynlong pat ka jingïalang pynkup burom bad pdiang burom ïaki ha Mawlai.
Naka liang u Bah Luistar Lyngdoh President ka FKJGP u la pynpaw ka jingsngewkmen ban iohi ba ka jylla kala nang kiew haki kam ïalehkai phutbol, bad katei ka jinglah ban lehkai bha ki rangïalehkai ka jylla ban poi shaduh ka thup phainal jong katei ka lympung ka long ka jingsarong kaba khraw ïaka jylla baroh kawei bad kyrmen skhem ruh ba ki rangïalehkai kin dang kilan kham bha shuh shuh ba kin ïoh ïa ka namjop.
