Nongpoh, Lber 06: Ka Synjuk ki Rangbah Shnong, Ri-Bhoi District mynta ka sngi kala buh ka jingdawa ba dei ban ai bhah doh kyndang lang haka thup jong ki myntri sorkar, ïaki nongmihkhmat na Ri-Bhoi District, kumba la iohi haka jingbhah doh kyndang haka thup myntri ha kane ka sorkar synrop thymmai bala jer kyrteng kum ka Meghalaya Democratic Alliance -2.0 (MDA-II), ym don uwei ruh ba mih kyrteng na Ri-Bhoi District ban ioh bynta haka sorkar.
Haba kren sha ki lad pathai khubor naka liang u Bah BB Makdoh Chairman ka Synjuk ki Rangbah Shnong u la ai khublei kyrpang ïa baroh ki MLA na ki 5 tylli ki Constituency ha Ri-Bhoi kiba la shah jied hadien bala dep ban pynbna ïaka result wat kito kiba shah rem, hynrei kaba sngewsih ka long ha kane ka sorkar synrop lang ka NPP, UDP, BJP, PDF bad HSPDP bad kumjuh ruh ki kyrtong shimet ban lam khmat da ka NPP ym don uwei ruh u nongmihkhmat na Ri-Bhoi ban ioh bhah doh kyndang ha ka liang ki myntri sorkar watla ki don 2 ngut ki MLA NPP ba kynthup ïa u Damanbait Lamare na Umroi, Sosthenes Sohtun na Jirang, bad u Bah Mayral Born Syiem naka UDP na Nongpoh Constiteuncy, ki ban don lang ha katei ka sorkar.
Kum ka Synjuk ka buh ka jingdawa ba la kumno kumno dei ban ai bhah Myntri sorkar uwei na Ri-Bhoi naka bynta ban wanrah ïaki jingkylla, ki kam pynroi haka district baroh kawei, kumba ka Ri-bhoi District ka dei kaba ju shah kyntaid ban don ki Minster wat haka sorkar kaba la dep ne ka MDA-I.
