Sdang u Prof. Henry Lamin da ka ‘Christ School’ ha ka shnong Mukroh

Jowai Lber 06: Ka shnong Mukroh ka long kawei na ki shnong kaba heh bad kaba dangsahdien ha ka thaiñ Border Block-I jong ka Jaiñtia Hills District, Meghalaya bad ka Karbi-Anglong District Assam, hynrei pat, ka jingdon jong u Prof. Henry Lamin uwei na ki nongshong shnong jong ka Mukroh uba bat mynta kum u Acting Vice Chancellor jong ka skul bah NEHU.
Une u Prof. uba sngewkhia shibun ïa ka jingsahdien jong ki nongshong shnong jong ka Mukroh bad ki shnong kiba marjan khamtam ïa ki nongshong shnong na ka thaiñ Block-I, ula shim ïa ka jingbah khlieh ban sdang da ka skul kaba long ka Shlem ban kyntiew ïa ka jingnang jingstad bad u la sdang ïa ka kawei ka skul kaba la ai kyrteng “Ka Christ School” ha shnong Mukroh bad ïa kane ka skul la plie hynne ka sngi (06/03/2023) hapdeng ka jingiphuh iphieng bad ka jingkmen ka bakhraw da ki nongshong shnong ka Mukroh bad ki shnong kiba marjan.
Kane ka skul ïa kumba long mynta ka don ki kyrdan pule naduh Nursery haduh Class VI bad ki khynnah skul ki don haduh 150 ngut.
U Prof. Dr. Henry Lamin uba dei u Nongtei bad u Nongseng ïa kane ka skul, haba kren ha kane ka sngi u ong ba u shim ïa kane ka jingkitkhia ban tei bad ban sdang ïa kane ka skul ka long ban kyntiew ïa ka jingnang jingstad ïa ki khun jong ka shnong bad ïa ki khynnah na ka thaiñ Labang-Nongphyllut Block-I ki bym don ki skul pule ha ki shnong ki thaw jong ki.
U Prof. Lamin u pynkut ia ka jingkren jong u da kaba khot ïa ki Nongshong shnong bad ïatreilang khnang ba kane ka skul kan nangïaid shaphrang ha ki por ki ban dang wan ym tang ha ka Class VI, hynrei sha ka Secondary, Higher Secondary bad kyntiew shaduh ka College bad ynda kane ka skul kan kiew shaduh ka kyrdan College, yn plie ruh ïa ki tnat jingpule bapher bapher, kata, Medical, Laboratory, Technology, Food processing, Welding, Fabrication, Plumping, Mushroom cultivation bad kiwei pynkut u Prof. Henry Lamin.
Ha kane ka sngi la ïoh ruh ïa ka jingkren kyrkhu kyrdoh bad kyntu kynpham da u ma Rameo Lamin, uba la kyntu jur ïa ki kmie ki kpa jong ka shnong ba kin ñiewkor ïa ka jingnang jingstad bad ban phah skul ïa ki khun jong ki ha kane ka skul ne sha kiwei pat ki skul, hynrei ban sahdum sahbiej kum ha ka juk jong ki longshwa manshwa te em.
Nangta u ong ka pyrthei mynta ka la ïaid shakhmat, ka pyrthei ka juk jong ki Kor ki bor, ki Mobile, ki Computer bad khlem ka jingnang kot nangsla, nangkheiñ nangdiah bad jingnang ban kren ïa ka ktien jong kiwei lym kumta ka longbriew manbriew kan ym poi shano shano ruh bad lah ban leh ïa kine kiei kiei baroh tang da ka jingnangkot nangsla bad pule sha ki kyrdan pule kiba heh.
Haba kren sha ki khynnah skul u ong wat ym sngewhun tang ban pass ïa ka Class VI na kane ka skul “CHRIST SCHOOL” hynrei bteng ban pule sha ki kyrdan pule kiba heh ba lashai la shisngi kin mih ki riewstad bad ki riewshemphang na ka shnong Mukroh bad na ki shnong kiba marjan jong kane ka thaiñ.
Ha kane ka sngi la ïoh ruh ïa ka jingkren kaba sngewtynnat bad ka sneng ka kraw ïa ki khynnah skul bad ïa ki kmie ki kpa da ka kong Embhah Lamin kaba long ruh ka Principal jong kane ka skul bad ïa ka jingkren ai khublei khatduh shwa ban pynwai ïa ka jingïalang plie (vote of thanks) da ka kong Nibudki Sariang kaba long kawei na ki nonghikai jong kane ka skul.