Jowai, Jymmang 17: Ka Khasi Student Union KSU Iooksi Circle ka pynpaw ka jingsngewkhia halor ka jingshah iehbeiñ bad lehbeiñ ïa ki skul Sorkar kiba don haki thaiñ Nongkyndong. Ïa kane, ka KSU Iooksi Unit ka la pynpaw hadien ba ka la ïoh ban leit jurip dalade hi ïaka Govt LP School Iooksi Iapkhla West Jaiñtia ha kaba ka seng ka la lap da la ki jong ki khmat ïaka jingdap um katei ka skul ha ka sngi 15 tarik.
Ka KSU Iooksi Unit hapoh ka jingïalam u Samla Sainia Sutnga President ka KSU Iooksi Unit, U samla Kamjuh Tangliang General Secretary ka KSU Iooksi Unit ha ryngkat ka jingdonlang u Head Teacher ka Iooksi Iapkhla Government LP School u bah D. Nongrum kila leit ban jurip ïa kane ka skul bad kila lap ba Katei ka skul ka la dap da ka um slap kaba jaw na ki tin kiba la pei bad kiba la bam sarang shi katdei eh.
Na ka liang u Head Teacher Katei ka skul ula ong ba katei ka skul kadei ka skul kaba la rim bha bad ka la kynjoh palat 102 snem ka rta, Hynrei ka jingbymshikhia ka Sorkar ban Tei Pynbha iakatei ka iingskul ka la buh jingeh ïaki khynnah skul bad iaki nonghikai ban pyllong skul haki por slap.
Shuh shuh ula pynsngew “ngi la dep ujor sha ki bor badei peit ïa kane ka jingjot kane ka ïingskul hynrei kam pat poi shano shano ruh” la pynpaw une u nonghikai. “Ngi isynei ïaki khynnah skul ba ki hap ban shongskul wat hapdeng ki um slap namar tang shu jaw slap malu mala kane ka ïingskul ka la dap daka um baroh kawei” la kren bynniaw utei u nonghikai.
“Sngewlehraiñ ban tip ba ka skul ka la kynjoh ïaka 102 snem, hynrei ka ïingskul ka dang jot rathai haduh mynta, Lada phai sha ka enrollment man u snem kane ka skul ka la nang kiew nangkiew kat nangmih ki snem bad kane ka skul ka dei ka skul kaba khampaw sha kine ki thaiñ jong ngi ha kaba ka la lah ban pynmih Shibun ki heh ki haiñ na kane ka skul” la pynpaw u nonghikai.
Naka Liang u samla Sainia Sutnga President ka KSU Iooksi Unit ula ong ba shen naka liang ka seng kan sa leit ïakynduh ïaki bor badei peit naka bynta ban pynbor ïaki ban peit lem ïa kane ka skul khnang ba ki khynnah kin nym mad jingeh ban shong skul haki por slap.
