Shillong, Jymmang 17 : Wat la u Nongïalam ka All India Trinamool Congress (AITC) u Dr Mukul Sangma um treh ban ïathuh ïa ki kyrteng hynrei u la kren shai ba u la dep bthah ïa ki arngut ki MLA ka AITC ba kin trei shitom bha shwa ka election MLA 2023.
“ Ki paralok kiba ym don kata ka bor ïakhun ban jop ïa kino kino ki jingïeng pyrshah ïa ki kum ki MLA la bthah ïa ki ba kin leit sha ki paidbah bad trei tyngeh bad kiba kum kita ki don tang kumba arngut ei ei napdeng ki 12 ngut ki MLA jong ngi” ong u Dr Mukul.
“ Ngi la ïakren bha wat ha ka party ruh da kaba ong ïa ki ba lada kim lah ban trei shitom bad lada sngewthuh ba kim lah ban wan phai biang ym banse hap ban ailad ïa kiwei kiba kwah ban ïakhun bad kiba don ka jingthrang ban shakri ïa ki paidbah” ong u Dr Mukul.
U la ïathuh ba kum ka Party ka la kren shai ïa kane naduh kaba sdang bad na kata ka daw ki don hi uwei ne arngut kiba sngewdon jingartatien. U la ong ka don ka jingïasngewthuh jingmut ruh kum ki riew rangbah ba don uwei uba la pan jingbit ban thaw lad ban ïakhun na kawei ka party ruh bad ïa kiba kum kita ki nongkyrshan jongki ha ki constituency ruh ki la dep tip lypa bad ym donkam ban shu ïathok ïajler ne saitkhuid kumba leh da ka NPP khamtam kat da u National President jongka uba tieng bad kyiuh thot thot ïa ka Trinamool Congress haba u ïohi ba ka kiew man la ka sngi.
Ki paidbah kin sa dap da ka jinglyngngoh ha ki khyndiat bnai ban wan ynda kila ïohi ia ka jingryngkang diengkper jong ki MLA na kawei ka seng saiñ pyrthei sha kawei pat. “ Kumta ngi la long kiba la pynkhreh lypa kumno ban tehsong ïa ki MLA jong ngi. Nga la ïakren bad ïamir jingmut la jan baroh 60ngut ki MLA bad nga tip bha ïa ki jingmut jingpyrkhat jongki. Kumta wat ma ngi ki 12 ngut ruh ngi la ïamir jingmut bha shwa ban mih noh na ka Congress wat la ki dang don san ngut ki bym shym la wan ryngkat bad ngi ruh. Kumta kane ka jingryngkang diengkper kan long naduh ka NPP, UDP, PDF, HSPDP bad wat ki kyrtong shimet ne KHNAM ruh. Nga la tip bha kaei kaba ki don ha ki jingmut jingpyrkhat jongki” pynkut u Dr Mukul.
