Shillong, Jylliew 25 : Arngut ki briew ki la shah kem ha ki bor pulit hadien ba ki la dung pynmynsaw ïa u dkhot ka Hynniewtrep National Youth Movement (HNYM) ha ka miet Sngi Saitjain ha Mawblei.
Ka khubor pulit ka ïathuh ba kane ka jingkulmar ka la jia hapdeng ki arliang mamla namar ba la don ka jingïaleh shongshit.
Une u dkhot ka HNYM uba mynsaw u dei uba kyrteng u Diness Mynsong bad mynta u don hapdeng ka jingshah sumar ha NEIGRIHMS. ïa ka ejahar halor kane ka jingshah dung jongu la ujor da ka kurim jongu hi ha Madanrting Police Station. U dei u dkhot jongka HNYM Mawjam Unit, Mawkynrew.
Uba donkti ha kane ka jingjia uba la shah kem nyngkong u dei u Shiningstar Wahlang bad sa uwei pat u paralok jongu uba ïadon kti lang ruh u la shah kem lang.
Na ka liang u President ka HNYM u bah Louis Dohtdong u la kynnoh ba kine ki arngut ki briew kiba donkti ban shoh ïa u bah Diness ki dei kiba ju myllien ban dih drok.
U bah Louis u la ïathuh ruh ba kitei ki arngut ki la kynroi ïa u bah Diness ha ka por ba ma u bad u paralok jongu ki dang leit phai sha la ïing hynrei uwei u paralok jongu Shining u la phet krad hadien ba u la shah khyrwit ha u paralok jongu Diness uba dei u dkhot ka HNYM hi. U bah Diness u la mynsaw jur na ka bynta u ryndang bad ka shkor ka diang.
