Pynursla, Jylliew 25: Ki paidbah nongshong shnong ka Nongsder ba don harum Pynursla ki la mad ïa ka jingkyrdot khait na ka daw ka jingthut ka internet la katto katne por bad kane pat ka wanrah jingeh ïa u babun balang.
Haba u Mawphor u la ioh ban ïakren bad katto katne ki nongshnong shnong ki la pynpaw ba kane ka jingthut ka network ka la don kumba shibnai eiei bad ki la ïathuh ruh ba ka jingthut ka network ka long naduh ka Airtel bad Jio.
“Ngi im ha ka juk jong ka Information and Technology bad kiba bun ki jingdonkam la leh beit tang na jaka shong hynrei mynta kane ka jingthut ka network ka la pynsyllang hi khait la kumba ngi im biang ha ka spah snem ba 20 bad kane ka jingthut ka network naduh ka Jio bad Airtel haduh ba tang ban kren briew ym long shuh ka la pynjynjar shisha ïa ngi. Kiwei ki la kren ïa ki network 5G ngi shane tang ka 2G ruh kam pat”, ong u samla Mewanteiskhem Mawiong haba kren bad u Mawphor.
“Ym tang ka internet network kaba thut hynrei wat ban call ruh ym long shuh bad nga kwah ban kyntu ïa ki bor khmih ban leh eiei ïa kane bad lada kim leh eiei lehse ngin hap pyrkhat da kiwei ki lynti ban pynioh ïa ka hok jong ngi”, u la bynrap .
