Shillong, Jylliew, 25: Ka Hill Farmers Union (HFU) ha ka sngi Thohdieng ka la aiti da ka dorkhas ha u Myntri Rangbah ka Jylla u Conrad Kongkal Sangma ban pynsngew ïa kiba bun ki mat ba ki nongrep kim shym la ïoh ïa ka hok.
Ka Unoin hapoh ka jingïalam jong u President u Bah Commamder Shangpliang bad u General Secretary u Bah Allfondbirth Kharsyntiew ka la dawa ïa ka Sorkar ban wanrah ïa ka Agriculture Policy ba pura jong ka jylla
Ka Union ka la pynkynmaw ruh ïa ka Sorkar ba ka jingsangeh ban siew jong ka sorkar ïa pisa lyngba ka Producer Group ka la wanrah ïa ka jingsngewsih ïa kiba bun ki nongrep kiba la trei shitom ban thaw ïa ki Kynhun.
Ka seng ka la pynpaw ïa ka jingsngewkhia halor ka jingbym ïoh shuh jong ki nongrep na ka jylla ïa ka PM Kissan bad ki la kyrpad ïa u Conrad ban ïakren sha Delhi.
Ka jing pynslem ka Sorkar ban siew ïa ka bailutksan sha ki nongrep kiba mad ka jingshah pynjulor ki mar rep ha ki bor ka mariang bad kane ka dei ka jingeh kaba khraw ba ki nongrep ki ïakynduh bad kyrpad ïa ka Sorkar ban peit lem.
Halor kine ki jingleit ïakynduh jong ka seng na ka liang jong u Myntri Rangbah u la kular ban shimkhia bad pynpaw ruh ba ka Sorkar jong u ka long kaba kloi ban ïatreilang bad ka seng ban kyntiew ïa ki nongrep ha kiba bun ki liang.
