Byrngem ïakhih ki nonghikai skul ha East Jaiñtia lada pyntreikam ïa ka App wan skul ki nonghikai

Shillong, Jylliew 25 : Ki Nonghikai skul ha East Jaiñtia Hills District ha ka sngi U Blei ki la byrngem ban pynlong da ka jingïakhih lada ki bor District kim pynsangeh noh ïa ka jingthmu pyntreikam ïa ka Ubi-Attendance App, ne ka App kaba buddien ïa ka jingwan jong ki nonghikai sha skul.
Kitei ki nonghikai hapoh ka kynhun jong ka Jaiñtia Hills Lower Primary School Teachers Association (JHLPSTA) Khliehriat Unit bad Meghalaya SSA Association (MSSASA) East Jaiñtia Hills District Unit, ki nonghikai ki la rai ruh ban nym leit ïashim bynta ha ka jinghikai ba la pynbeit da ka District Mission Coordinator (DMC) kaba long kat kum ka jingbthah jong u Deputy Commissoner naduh ka 26 tarik Jylliew ha ka 28 tarik Jylliew.
“Hadien ka shuti shiteng snem, ngin sa shim ïa ka sienjam ba tyngeh halor kane ka kam. Ngin sa pynlong ïa ka jingïashong kyllaiñ myngor hakhmat ka Ophis u DC ban dawa pynsangeh noh mardor ïa ka jingpyntreikam ïa ka Ubi-Attendance App,” ong u President ka MSSASA, u Bah Aristotle C Rymbai.
Nalorkata u ong ruh, “Ngi kyntu ruh ïa baroh ki nonghikai ba kin ym leit shimbynta ha ka training ba la pynbeit da ka DMC naduh ka 26 tarik Jylliew haduh ka 28 tarik namar ngi la dep ban aiti da ka shithi naduh ka 19 tarik Jylliew, ba pynpaw ïa ka jing pyrshah kaba jur ban pyntreikam ïa kane ka App.”
Utei u President ka MSSASA u la ïathuh ruh ba ki arseng ki la kyntu ïa u Myntri ka tnad Pule Puthi, u Rakkam A Sangma ha ka 23tarik mynta u bnai ba un tuklar lem halor kane ka jingthmu ban pyntreikam ïa ka Ubi-Attendance App.
“Ngi kyndit ban tip na u Myntri ba u DC ula pyntreikam ïa ka Ubi-Attendance App khlem ka jingai jingmynjur jong ka Sorkar Jylla. Namar kata, u Myntri ula bthah ïa u Director ka School Education & Literacy (DSEL) ban pan jingpynshai na u Deputy Commissioner ka East Jaiñtia Hills bad ban aiti ïa ka kaiphod halor kane ka kam” la ïathuh shuh shuh u Bah Aristotle. Ym tang katta u ong ruh, “Ngi la kyndit ruh halor ka shithi ba la ai da ka DMC sha baroh ki cluster resource person ba kin pynlong ïa ki jingai jinghikai ba kumno ba kin pyndonkam ïa ka Ubiattendance App”.
Ha kajuh ka por, u la ong ruh ba ki pynrem ïa kane ka jingthmu ban pynlong ïa ka jingai jinghikai ha ka por ba baroh ki skul ki dang pynlong ïa ka eksam shiteng snem.
“Ka jingkylli ka mih la ki nonghikai kin leit sha skul ban pynïaid ïa ki eksam lane leit sha ka training programme. Kane ka pyni shai ba ki artylli ki Ophis u DC bad DMC kim don jingkitkhlieh satia halor ki jingeh ba ïakynduh da ki khynnah skul hynrei ki kham kheiñ kongsan kumno ban pyntreikam ïa ka Ubi-Attendance App ïa kaba ngi sngew ba ka dei ka bym lah satia ban pdiang” ula ong.