Shillong, Jylliew 23 : Ka nongbah Shillong ka la ïoh sa ïa kawei ka jaka die ar Shaka kaba thymmai jong ka kompeni kaba na Japan ka Honda, kaba la ai kyrteng da ka Shadap Honda kaba don ha Mawblei kaba dei trai da u Bah Bhakupar Shadap.
Ïa kane ka jaka die ar shaka kaba dei ruh ka Dealership kaba nyngkong eh jong ka Honda ha Nongbah Shillong, la plie ha ka sngi Saitjaiñ da u Yogesh Mathur uba dei u director sales and marketing, Honda Motorcycle and Scooter India, ki heh kompeni Honda, u Bah Bhakupar Shadap bad kiba haiing hasem, ki staff bad kiwei kiwei.
Ha kane ka sngi la aiti ruh ïa kawei ka thuk thuk bad kawei ka Scooty sha ki Customer ba la thied ïa kine ki ar shaka ha kane ka sngi. Ha kane ka kompeni ki don baroh saw jait ki model ha ka Scooty, ba kynthup ka Activa bad Dio, kaba 110cc, bad kumjuh ka Activa bad Dio ba 125 cc. Katba ha ka Motorcycle, ki don khyndai jait ki model, naduh kiba 110cc haduh kiba 200cc.
Haba kren sha lad pathai khubor u Mathur u la pynpaw ïa ka jingkmen kaba shikatdei eh, ban ïoh plie ïa kane ka showroom die arshaka ba nyngkong jong ka kompeni Honda ha nongbah Shillong bad ka Dealership kaba 25 ha NE.
