Sha Turkey yn leit ïakhun u Bah Hubert Paliar ha ka World Arm Wrestling C’ship

Shillong, Risaw 12 : U Bah Hubert Paliar uwei na ki samla rangbah ka jylla ha ka jingïalehkai ïakhun kti mynta ka sngi Palei ha ryngkat ki 9 ngut kiwei pat ki nongïakhun kti un mih na la ka jong jylla ban leit ïashim bynta ha ka 43rd World Arm Wrestling Championship kaban long ha ri Turkey naduh ka 14 tarik haduh ka 23 tarik Risaw 2022.
U Bah Hubert Paliar uba don ruh ka jingduna ha ki bor ïoh sngew bad ym lait kren un sa ïashim bynta ha ka jingïakhun ha ka kyrdan jong ki briew ba duna dkhot met.
Na ka liang ka kong Miriam Thangkhiew kaba dei ka kurim ka la pynpaw ka jingsngew nguh bad ai khublei ïa baroh kito kiba la don bynta ban noh synñiang na bynta u Bah Hubert Paliar ha ka jingleit jong u bah mihkhmat ïa ka jylla bad ka ri India sha katei ka jingïalehkai ha Turkey.
Ha ka jingïakynduh bad ki nongthoh khubor ha Shillong Press Club ha ka sngi Balang, ka Kong Miriam ka la ïathuh ba u Bah Hubert Paliar u la ïoh ban pynkhreh mynta tang kumba shi bnai. Ha ka jingïarap ban batai ïa ki jingkren, ka Kong Miriam ka la ïathuh ba u Bah Hubert Paliar u ai khublei ïa baroh ki paidbah kiba la ïarap ban noh synñiang bad kyrpad ruh ban buh jingdwai lem na bynta jong u ha ka jingleit ïashim bynta ha kateika lympung.
Ka la batai ruh ba u Bah Hubert Paliar u kyrmen skhem ba un wanrah jingjop na katei ka jingïakhun.
Nalor u Bah Hubert Paliar, kiwei pat kiban leit ïakhun sha Turkey ki kynthup ïa u Bah Alan S Marbaniang, Kishore Chettri, Everson Thangkhiew, Angel Merry Mylliem Umlong, Airiky-menlang Lyngdoh, Margaret Pathaw, Alexan-der Lyngdoh bad Banshan Terang. U Mainbor Khyriem (Refree/Official) bad u Bah Nick Nonglyer (Refree).