11 ngut yn ïashim bynta ki samla ka jylla ha ka jingïakob kieng lieng ha wah Umtrew
Sdang mynta ka sngi 13-10-2022

Shillong, Risaw 12 : Ka jingïakob kieng lieng kaba la tip kum ka “Meghalaya Kayak Festival 2022’ kan sdang mynta ka sngi Palei ha wah Umtrew jong ka shnong Umtham, Ri-Bhoi District ha kaba 11 ngut ki samla kin mihkhmat ïa ka jylla ha katei ka jingïakop kieng lieng.
Ki 11 ngut ki samla ba kynthup phra ngut ki samla Khasi kiban ïashim bynta ha katei ka jingïakop kieng lieng ki kynthup ïa u Khrawbor Mawnai (20 snem) , Pynshngaiñ Kurbah (17 snem), Bishnu Sharma (16 snem), Indra Sharma (12 snem) , Dameshwa Kurbah (16 snem), Batskhem Nongbak (16 snem), Mebanjop Kharkrang (16 snem) , Gilbert Kharkrang (21 snem), Payaskhem Kurbah (17 snem), Vikas Rana (20 snem) bad u Kyrshanborlong Khyriem (20 snem).
Ha katei ka jingïakop kieng lieng kaban neh saw sngi kaban kut ha ka 16 tarik Risaw, kin don haduh 100 ngut kiban ïashim bynta na ki 20 tylli ki ri jong ka pyrthei ba kynthup ki nongïalehkai Olympic. La phiah ha ki lai tylli ki kyrdan ïakop kieng lieng ba kynthup ïa ka Downriver Time Trial, Extreme Slalom bad Downriver Freestyle na bynta ki nongïalehkai professional kumjuh ruh na bynta ki amateur bad kiba dang khynnah.
Ki nongïashim bynta kiba kham paw kiban ïashim bynta ha kitei ki saw sngi na ki ri ka pyrthei ki kynthup ïa ka New Zealand, United Kingdom. Germany, France bad Canada. Ki katto katne ki nongïalehkai ki kynthup ïa ka Beth Morgan, Nouria Newman, Sofia Reniso, Giovanni De Gennaro bad Andi Brunner.
Ki nongïalehkai kiba napoh ri India ki kynthup ïa u Amit Magar, Ashu Rawat, Anne Matthias, Nisphul Jose, Manish Rawat, Pinky Rana bad Naina Adhikari kiba dei ki nongïakop kieng lieng ba pawkhmat kum na ka jylla Uttarakhand, Karnataka bad Kerala.