Shillong, Naiwieng 12 : U nongïasaid aiñ jong u bah Gabriel K Iangrai u la ïathuh mynta ka sngi ba ka ïing bishar ( Special Court) ka la phah ban set ïa une u pulit ophisar uba la shah sospon na ka kam sha phatok tad haduh ka 25 tarik Naiwieng 2022.
Hadien ba ka ïing bishar ka la phah ban set noh ïa u sha phatok, la ïalam ïa u da ki pulit mynta hi ka sngi.
ïa u bah Iangrai la kem da ka kynhun SIT jongka tnad CID ha ka 2 tarik Naiwieng bad hadien kane haba la ïalam ïa u sha hospital ki doktor ki la bat noh ïa u namar u don hapdeng ka jingshitom.
La kem ïa u halor ka jingkynnoh ba pyndonkam bakla ïa ka pisa ba la mang ban tei ïa ka National Emergency Response System (NERS) Public Safety Answering Point (PSAP) facility ha Sadar Police Station Complex.
Shwa ban kem ïa u ka tnad CID ka la dep rejister case pyrshah ïa u naduh ka 28 tarik Risaw halor kine ki jingkynnoh.
Kat kum ka FIR la kynnoh ba u khlem khot Tender lane ai ïa ka kam sha ki tnad tei jingtei ka sorkar hynrei u la tei hi ïa katei ka Complex da kaba pyndonkam da ki pulit da kaba thied hi ïaki tiar ki tar na u kontraktor kaba long ka jingpynkheiñ ïa ka Meghalaya Financial Rules. Khlem da don ki jingkheiñ jingdiah kiba biang naduh ka jingpynshong dor ïa ka jingtei, ka bai nongtrei, u la shu ai UC halor ka pisa ba la mang. Nalor kane la kynnoh ba u la shu ai ïa ka Completion Report ruh da kaba shu thok shu shukor khlem da ïoh ka jingsoi ne jingmynjur na u engineer ne na ka Inspection Committee.
