Dei ban boycott ïa ka TMC ha Meghalaya bad ha baroh ki jylla riewlum: BJP

Shillong, Naiwieng, 12: Ka Bharatiya Janata Party (BJP) ha ka sngi Saitjaiñ ka la khot bad wer ïa ki nongshong shnong ka jylla Meghalaya bad ïa ki riewlum ha ka ri India baroh kawei ba kin ‘boycott’ ïa ka Trinamool Congress halor ka jing kynthoh pyrshah jong u Myntri Sorkar ka Trinamool Congress (TMC) u Akhil Giri ïa ka President jong ka ri India ka Droupadi Murmu.
“Ka Droupadi Murmu ka la thaw histori kum ka kynthei riewlum banyngkong eh ban kiew sha ka kyrdan President jong ka ri India. Ka la long ka nuksa ïa ki milion ngut bad ka jingkyrmen ïa ki riewlum kiba im bad kiba shong basah ha ka ri India,” ong ka BJP Megha-laya State Unit ha u kyrwoh.
“Hynrei, u Akhil Giri u Myntri na ka Trinamool Congress (TMC) u la pynhiar kyrdan ïa ka saiñhima khamtam ïa lade shimet da kaba kynthoh pyrshah ïa ka dur ka dar jong ka President jong ngi. Ka jingbuh jingkylli jong u, ‘ka long kumno ka dur jong ka President,’ ka pynpaw ïa ka jinglong jaboh bad poh bad pyrkhat tang ïa kiba heh ba khraw,” la ong ka BJP.
U State President ka BJP u Bah Ernest Mawrie u la pynpaw ba kane ka jingkynthoh ka long kum ka kam runar riewdum bad kaba long pyrshah ïa baroh ki riewlum ha ka ri. U pynrem jur ïa une u Myntri ka TMC uba nud ban kynthoh kat ïa ka President ka ri
U la buh jingkylli ruh ïa ka jingbuh kyrdan u nongïalam ka TMC ïa ki riewlum ha kane ka jylla. U Bah Mawrie u la ong, “lada ki (TMC) don kum kane ka jingpyrkhat na ka bynta ka President ba donburom jong ka ri tang namarba ka dei ka riewlum, kumno ki leh ïa ki riewlum kiba don ha ka jylla kiba la mad ïa ki jingeh na ka daw ka jingbym don ka roi ka par.”
“Nga khot bad wer ïa ki paidbah ban ‘boycott’ ïa ka TMC ha ki jylla ba shong basah ki riewlum bad ha kane ka jylla Meghalaya,” ong u Bah Mawrie.