Sha ka 5.30 lak la kyntiew ïa ka bai sumar na ka MHIS, pynbna u Myntri ka Koit ka Khiah

0

Shillong, Naiwieng 07 : Ka sorkar jylla mynta ka la kyntiew sha ka 5.30 lak tyngka ka jingkyrshan pisa bai sumar na ka bynta kito kiba don ïa ki card Meghalaya Health Insurance Scheme na ka 5 lak kaba ka treikam baroh shi katta.
Ïa kane la pynbna da u Myntri ka tnad ka Koit ka Khiah ka sorkar jylla, James K Sangma ha ka jingïalang buh ïa u mawnongrim ban tei ïa ka Bajengdoba Community Health Centre hynne ka sngi Nyngkong.
“Kane ka jingkyntiew naka 5lak sha ka 5.30lak na ka bynta uwei uwei u nongpang ka kynthup ruh wat ïa kito kiba shu leit shim dawai hapoh katei ka skim,” ong u Myntri ka Koit ka Khiah.
La pynbna ruh ba ka kynhun ba nyngkong jong ki doktor na ka jylla shen kin leit sha Tamil Nadu ban leit shim bynta ha ka jingshah hikai hadien ba ka sorkar Meghalaya ka la dei ban soi ïa ka soskular bad katei ka jylla na ka bynta ban pynjanai shuh shuh ïa ka rukom ai sumar khamtam eh ha ki jaka sumar kiba don ha kyndong jong ka jylla.
Ki stad doktor na Tamil Nadu kin ai ka jingïarap ïa ka jylla Meghalaya ha kiba bun ki jaka sumar jong ka jylla bad na ka lïang u Myntri ruh u la kyntu ïa ki nongshong shnong ba kin ai ka jingïatrei lang bad kitei ki doktor kiba wan na katei ka jylla.
U Myntri u la pynpaw ruh ïa ka jingkmen ba hadien 32 snem ba la lah ban kyntiew kyrdan ïa katei ka PHC kaba don ha Bajengdoba.
Ha katei ka jingialang buh mawnongrim la donlang ruh naduh u MLA ka Bajengdoba u Pongseng Marak, Symbud Lamphang bad MLA ka Resubelpara u Timothy D Shira, MLA ka Kharkutta, u Rupert Momin, bad kiwei kiwei ki MDC.

Leave A Reply

Your email address will not be published.