Shillong, Naiwieng 07 : U MLA ka Shillong North, Bah Adelbert Nongrum u la ong ba lada baroh kiba sah ha Them-iewmawlong ba lada baroh kiba sah ha Them-iewmawlong ki dei ki nongtrei sorkar kumta kam don jingeh ei ei ban pynkynriah noh ïa ki sha ki quarter jong ka sorkar hi.
“Lada kito kiba sah hangtei kidei kiba trei ha ki tnad sorkar bapher bapher dei ban pynkynrïah noh ïa ki sha ki quarter jong ka sorkar. Hynrei, nga imat ki don kiba wan sah beaiñ ruh. Lada ym dei kumta balei pat ban shu pynslem?. Kane ka pynti ba ka sorkar ka tlot watla ka don ïa ka bor ban pyni ïa kito ki bym kohnguh ban ïa trei lang bad ka sorkar,” ong u Bah Adelbert haba kren bad ki lad pathai khubor.
Shuh shuh u ong ruh ba lada na ka liang u Symbud Myntri Rangbah ka jylla, Bah Prestone Tynsong u ong ba ym don satia kiba sah beaiñ, u la dei ban phah pynkynriah mardor ïa ki nangtei.
Utei u MLA u la pynpaw ruh ïa ka jingbynñiaw ba ka sorkar naduh kaba sdang kam shym la kynthup lang ïa u ha ka High Level Committee kaba ïadei bad katei ka ishu pynkynriah ïa ki briew kiba sah ha Them-iewmawlong sha kawei pat ka jaka. U ong ruh ba ka sorkar mynta ka la dei ban sdang ban pynkynriah noh ïa ki nongtrei jong ka kiba sah hangtei sha ki iing sorkar kiba la don lypa ha ka ophis treikam barim jong ka Shillong Municipal Board.
U ong ruh ba kum nongmihkhmat paidbah na katei ka thaiñ watla ka elekshon ka la jan um kwah pat ban ïapein ïa ka ishu na ka bynta ka bit ka biang lang jong baroh.
