Ainguh ïa u Blei ba u dang ailad ïa ngi ba ngin im : Agnes &Amita

Dap 4 snem ka jingthmu pynïap ki runar ïa ki nongïalam CSWO

0

Shillong, Naiwieng 7 : Lashai ka sngi la dap saw snem ka jingthmu dkhat jubor ki runar khaïi dewiong beaiñ ïa ka jingim jong i kong Agnes Kharshiing bad ka Amita Sangma bad halor kane kine ki arngut ki la pynpaw ka jingsngewnguh ïa U Blei uba la ailad biang ïaki ba kin dang im haduh mynta bad khamtam ïa kito baroh kiba la ïadon ryngkat bad ki ha katei ka jingïakynduh ïaka jingjia ba kthang tam.
“ Ngi ai nguh ïa U Blei ba u la ai biang ha ngi sa shisien ban ïoh im bad dei da ka jingdon ryngkat bad jingïada jongu ba ngi dang im mynta saw snem hadien ka jingshah bom ha ki runar khaïi dewiong beaiñ ha ka 8.11.2018. Ngi ai khublei ruh ïa baroh ki paralok parajor, kiba haïing hasem bad ïa baroh hi kiba la ïai buh ïa ngi bad ki ïing ki sem jongngi ha ki jingduwai ha kum kato ka por ba ngi hap ban ïaid ïa ka lynti kaba kthang tam” ong I kong Agnes bad Amita.
“Ngi ruh ngin ïai buh ha ki jingduwai ïa baroh lang katba ngi dang im ha kane ka pyrthei shong basa ba itynnad tam kaba U Blei ula ai ha ngi baroh. Ngin ïai don ryngkat bad ïai ïarap ïa kito kiba donkam ïa ka jingïarap jong ngi. Ngi ai khublei ïa kiba haïing hasem bad ka ïing ka sem jong ngi kiba la don ha syndah jongngi ha kato ka por ba ngi mad ïa ka jingbym tip briew bad ngi duwai ba U Blei un ïai theh ki jingkyrkhu halor jong phi baroh” ong biang ki arngut.
Ha katei ka 8 tarik Naiwieng 2018 I kong Agnes bad ka Amita ki la shah bom ha ki riew runar khaïi dewiong beaiñ ha Shohshrieh ha kaba kitei ki runar ki la mut beit ba ki la iap namar la shu bret ïa ki sharud surok, hynrei da ka jingdon ryngkat U Blei ki la ïoh ka jingsumar kaba biang tam ha NEIGRIHMS bad ki la ïoh pat ïa ka jingkoit jingkhiah. Kine ki arngut ki la shah bom namar ki ïeng pyrshah ïa ka jingkhaïi dewiong beaiñ ha katei ka thaiñ East Jaintia Hills. Kane ka jingjia ka la jia ruh ha ka por ba ka NGT ka la khang sbak ïa ka jingtih bad khaïi dewiong beaiñ ha ka jylla Meghalaya kaba long naduh ka 17 tarik Iaiong 2014.

Leave A Reply

Your email address will not be published.