Sha California yn leit ïakhun u Kitkupar Nongsiej ha ka World C’ship of Performing Art

Shillong, ïaïong, 08: U samla Kitkupar Nongsiej uba la jop ïa ka nam lahduh ha ka Sur Kynud Season-3 ba la pynlong da ka Don Bosco Media Network (DBMN) u la shah jied ban leit ïashim bynta ha ka rynsan ïakop rwai kaba la tip kum ka World Championship of Performing Art ban sa long ha ka nongbah California, United States of America naduh ka 17 tarik haduh ka 29 tarik, Naitung, 2025.
Na ri India dei tang u samla Kitkupar Nongsiej, 22 snem ka rta uba dei na ka shnong Kynshi, Eastern West Khasi Hills uba la shah jied ban leit ïakhun ha kane ka rynsan ïakob rwai ha kaba yn sa ïashim bynta da ki nongrwai na ki 70 tylli ki ri ka pyrthei.
Une u samla un sa mih na Shillong ha ka 15 tarik Naitung, 2025 bad na ka liang jong ka All Meghalaya Dancers Association (AMDA) kaba ju kyrshan bha ïa ki samla kiba don ïa ki sap ki phong bapher bapher ka la kyrpad ïa ki riewpaidbah, ïa ki kynhun bapher bapher kiba don ka mynsiem ïarap lem kynthup ruh na ka Sorkar Jylla ban ïarap na ka bynta ka bai leit bai wan bad kiwei kiwei de ki jingdonkam jong u samla Kitkupar Nongsiej.