Seisoh ka jingpynlong ka NEHUSU bad ka MCA ïa ka MTB Cycling Competition 2025

Shillong, Jylliew 29: Ka North-Eastern Hill University Students’ Union (NEHUSU), ha ryngkat ka jingïatreilang bad ka Meghalaya Cycling Association [MCA], ka la lah ban pynlong ïa ka ‘MTB Cycling Competition 2025’ kaba jop ha ka sngi Saitjaiñ ka 28 tarik Jylliew, 2025, jong ka taïew ba ladep.
ïa kane ka jingïakop ñiah saikil la pynlong ha NEHU Cycling Track kaba marjan ka Convocation Hall bad ka la khring ïa ka jingwan ïashim bynta kaba shitrhem na ki nongñiah saikil ha kylleng ka ri India bad khamtam eh na ki jylla jong ka thaiñ Shatei Lam Mihngi.
Kane ka jingïakop ka la sdang naduh ka por 10 shiteng mynstep bad la pynkut ha ka por 12 shiteng mynsngi.
Ïa kane ka jingïakob la wan sakhi bad kyrshan da ki katto katne ngut ki riew rangbah ba pawkhmat, kiba kynthup ïa u Prof. Sumarbin Umdor, u Pro-Vice Chancellor jong ka NEHU, Shillong; u Bah Lening Bareh, President jong ka Meghalaya Cycling Association, u Bah Treiborlang K Musalman, Asst. General Secretary jong ka MCA; u Bah Sandy Sohtun, President jong ka NEHUSU; kumjuh ruh u Bah Soki Syrti – Sports Secretary jong ka NEHUSU lem bad kiwei de ki dkhot nongkitkam jong ka NEHUSU bad ka MCA.
Kane ka jingïakop ka la rakhe ym tang ïa ka jingtbit jong ki nongïalehkai hynrei ka wanrah ruh ïa ka jingïatylli ha ka thaiñ bad ka jingïashim bynta jong ki samla. Ha kane ka sngi la ïoh ruh ban pynkup burom sha ki nongjop naduh kiba wan ba nyngkong haduh kiba wan kyrdan ba hynriew da ka khusnam pisa ba la kyrshan da ki nongpynïaid.
ïa ka nam lahduh la jop da u Khariksing Adonis Tangpu na Manipur bad u la khur ïa ka song khusnam kaba T.30,000, katba u Kevin John Kyllait (Meghalaya) u la bud ha ka kyrdan baar bad khur ïa ka song khusnam kaba T.20,000, bad u Arianborlang Mawblei (Meghalaya) u la ïoh khur T.10,000 hadien ba jop ïa ka kyrdan ba lai.
Nalor kine lai ngut la ïoh ruh ban sam khusnam kaba mar T5,000 kum ka Consolation Prize sha lai ngut kiba la wan kyrdan ba 4 haduh ba 6, kine ki long u Ronel Khundrakpam, u Tajum Dere (Arunachal Pradesh) bad u Riviklang Lyngdoh Nonglait (Meghalaya).
Hadien ba la wai na ka liang jong ki nongpynïaid ki la ai khublei ïa baroh ki nongjop bad pynpaw ïa ka jingsngewnguh kaba khraw ïa uwei pa uwei u nongïashim bynta bad ki nongtrei mon sngewbha kiba la noh synñiang ban pynlong ïa ka jingïalehkai kaba jop bad kaba seisoh.
Lah ban kdew hangne ba ka ‘MTB Cycling Competition 2025’ ka la long ka sienjam kaba kongsan ha ka ban kyntiew ïa ka kolshor jong ka jingïakop ñiah saikil bad ka jingïatylli ha ka jingïalehkai ha kane ka thaiñ.