Shillong, Jylliew 29: Ka Mawkasiang SC bad ka Mawshubuit SC ki la khur pura ïa ki lai point hadien ba ki la jop ïala ki jong ki jingïalehkai jong ka lympung Shillong Sports Association Under-20 Fourth Division 2025 ba la long ha ka sngi Saitjaiñ ha madan First Ground-SSA Stadium, Polo.
Na ka liang jong ka Mawkasiang ka la lah ban pynliem noh da 2-1 kol ïa ka Lapalang SC ha ka Group C, katba ka Mawshubuit SC ka la jop da 3-0 kol ïa ka Thynroit SC ha ka Group A. Kawei pat ka jingïalehkai ha kane ka sngi ka la kut ha ka jingïakhaid hapdeng ka Them Rangshken SC pyrshah ïa ka Pynthorbah SC ha ka Group B.
Ha ka jingïalehkai kaba nyngkong ki ar kol na u Kyrmenskhem Mukhim (3′ & 8’minit) kiba la thep hapoh ka 10 minit jong ka kylla step ka la pynskhem ïa ka jingkyrmen jong ka Mawkasiang ban khur ïa ka jingjop.
Watla u Banjop Pohlong (45’minit) u la ïoh ban pynphai shi kol ha ka kylla miet hynrei u la pynsyrwa pat ïa ka kabu ban pynïakhaid hadien ba ka penalty jong u la shah khanglad noh ha u rangapkol jong ka Mawkasiang u Pyndapborlang Kharmalki, kaba la pynlong ïa ka Lapalang ban mad ïa ka namrem.
Kane ka jingjop ka la kyntiew ïa ka Mawkasiang sha ka kyrdan ba ha khlieh duh jong ka Group C da kaba kamai 6 poiñ na ki arsien ïalehkai. Katba ka Lapalang ka la hiar sha ka kyrdan kaba ar; da kaba kamai 4 point na ki lai tylli ki jingïalehkai.
Ka jingïalehkai kaba bud hapdeng ka Them Rangshken bad ka Pynthorbah ka la kut da kaba ïasam mar shi point naba ym shym la don ba lah pynkhihjar. Kumta ka Them Rangshken ka dang ïaineh ha khlieh duh jong ka Group B da kaba kamai 7 poiñ na ki lai tylli ki jingïakhun, katba ka Pynthorbah ka wan balai da kaba kamai 2 poiñ na ki lai tylli ki jingïalehkai.
Ha ka jingïalehkai ba khatduh, la sakhi ïa ka Mawshbuit kaba la khur pura ïa ki 3 point ba nyngkong da kaba jop pyrshah ïa ka Thynroit da 3-0 kol. Kine ki lai kol la thep da u Ezra Ryntathiang (16’min), Lawthangsang Gangte (48’min) bad u Lurshai Wankhar (76′).
Da kane ka namjop ka Mawshubuit SC ka la jam sha ka kyrdan ba ar ha ka Group A; da kaba kynjoh mynta 4 point naki lai sien ïalehkai. ka Thynroit ka la hiar sha ka kyrdan ba lai da 3 point naki lai sien ïakhun.
Ha kane ka sngi Nyngkong ka jingïalehkai kaba nyngkong kan long ha ka por 10 shiteng mynstep hapdeng ka Mawlynrei bad ka Lumpyngngad na ka Group F, nangta bud sa ka jingïalehkai hapdeng ka Umsohsun bad ka Pommura, na ka Group D ha ka por 1:30 baje mynsngi bad khatduh ka jingïalehkai ha ka Group E hapdeng ka Laitumkhrah pyrshah ïa ka Krang ha ka por 4 baje janmiet.
