Sei ïa ki longkmie ban ïakhun elekshon, kyntu ka National President ïa ka BJP Meghalaya

Shillong, Naiwieng 02 : Ka Nationa President jong ka BJP Mahila, ka Vanathi Srinivasan ha ka jingwan iuhkjat kaba arsngi ha nongbah Shillong ka la ong ba ka party ka ailad bha ïa ki longkmie ba kin ban aireng ha ki elekshon bapher bapher khamtam eh ha ka elekshon MLA.
“Lada nujor bad kiwei ki party, ka BJP ka ailad bha ïa ki kynthei ba kin mih shakhmat bad aireng ha ki elekshon bapher bapher la ka long ha ka elekshon MP lane ha ki elekshon ha ki Iing Dorbar Thawaiñ ka jylla,” ong katei nongïalam BJP haba kren bad ki lad pathai khubor ha kane ka sngi Balang ha Shillong.
Shuh shuh ka ong ruh ba ka BJP kadei kawei na ki party kaba burom ïa ka bor jong ki kynthei ha ka politik. “Hynrei ban ïohi pat ïa ki kyrtong kiban jop la ka long ïa ki kyrtong kynthei ne shynrang kata kadei kaba kongsan bha. Dei na kane ka daw ba ki nongtrei ka BJP ki buh hakhmat duh ïa kane ka bynta,” ka la bynrap biang.
Nalorkata, ka ong ruh ba na ka liang ka party ka ai jinghikai na ka por sha ka por ïa ki nongtrei party ba kin lah ban sei ïa ki kyrtong kiba don ka jingkyrmen ban jop.
Ka la ïathuh ruh ba ka la kyntu ïa ka state unit ba kan ailad bun ïa ki longkmie kum ki kyrtong kiba don jingkyrmen ban jop ym ban shu sei kyrtong tang ka kyrteng.
Shwa kane, katei ka nongïalam BJP ka la pyntip ruh ba ka jingwan jong ka sha Meghalaya ka long ban kynduh ïa ki nongïalam jong ka BJP Mahila na ka bynta ban pynkhreh ïa ka elekshon MLA ha u 2023 ha ryngkat ka jingdonlang u President ka party Bah Ernest Mawrie bad ruh u MLA ka party Bah AL Hek.