Ki khajna ki la poi lut sha pla ka NPP bad leit theh pat sha kiwei ki Jylla: Egenstar

Shillong, 02 Naiwieng: U nongialam ka People’s Democratic Front (PDF), Bah Egenstar Kurkalang uba dei ruh u kyrtong ka Party ha ka elekshon jied nongmihkhmat sha ka ïing Dorbar Thawaiñ ka Jylla na Nongkrem Constituency u la ther tyngeh ïa ka National People’s Party (NPP) da kaba ong ba ka khajna ba lum ka Sorkar ka la poi lut sha pla ka NPP bad katba ki paidbah ki dang im ha ka duk ka kyrduh hynrei ka NPP pat ka bunkam leit pyniar Party sha kiwei kiwei pat ki jylla.
Haba kren ha ka jingïalang pynskhem ïa ka kynhun treikam ki samla ka PDF na Mawkynrew Constituency lane ka People’s Democratic Youth Front (PDYF ) Mawkynrew Constituency ha Thangsning ha ka 02 tarik u Naiwieng, 2022, une u nongïalam u la ong ba haduh mynta ka Sorkar ha ka jingïalam ka NPP kam shym lah wat tang ban pynrung kam ïa ki samla ha ki kam kiba lait.
“Haduh mynta wat ka subsidy jong ka sboh dawai urea ïa kaba la mynjur da ka Sorkar India ruh kam pat thep ban pynpoi noh sha ki nongrep ka Jylla wat haba ïa ka tnad Finance ka Sorkar Jylla la bat hi da u Myntri Rangbah, Conrad K Sangma”, la kynnoh u Bah Egenstar da kaba bynrap ba kat shaba leit ka Jaidbynriew ka shah khniot kat shaba phai.
“Hynrei ynda wan pat sha Mawkynrew ki kynnoh ba ym ler u Bah Pai (Banteidor Lyngdoh, uba bat ïa ka kam kum u Myntri ka tnad Agriculture) bad ba u dei u nongwei”, u la ong da kaba bynrap ba u Bah Banteidor u ïarap sha ki para Jaidbynriew Khasi Pnar ha kylleng ki jaka. “Hato um don hok ban shakri ia ka Mawkynrew haba u dei u rishot ban kyrshan ïa ka Jaidbynriew ?”, u la buh jingkylli.
Da kaba ïathuh khana shaphang ka jingïaleh ban ïoh pyndonkam biang ïa ka dawai sboh ha ka Jylla, u la ong ba dei u Bah Banteidor uba la shim khia ïa ka kam katba kiwei pat ki kam ei ïa ka kam kaba u leh. “Ha ki snem ba la dep kiew dor ka Urea bad kumta ngi la phah jingthoh sha u Bah Banteidor bad ai kopi sha u Myntri Rangbah ka Jylla”, u la ïathuh.
“Hadien ka jingïakynduh la rai ban ailad biang ban pyndonkam ïa ka dawai sboh bad ki paidbah ki dei ban sngewthuh ba ka tnad ba dei peit ban ai jingmynjur ka dei hi ka tnad kam rep ym da kiwei pat ki tnad ba peit da ki party kiba heh ne bun MLA”, la ong u Bah Egenstar uba la ong pat ba ynda la dep trei bha kiwei don pat kiba sdang sa ka kam ei.
U la kynthoh ruh ba don ki briew ba tang ym don pisa na ka Party ruh la tieng bad phet shawei pat ban ïaleh ïa ka elekshon. “Nga ïaleh ïa ka elekshon ban shakri ïa ki paidbah ym ban khmih lynti ïa ka party ba ai pisa”, u la ong. “Ki party heh ai kin kren katba mon tangba ha u 2023 kin sa kut ka jingheh”, la ong une u nongïalam.