Ki 342 ki long ïing ki Harijan kim dei kiba sah beaiñ ha Them Iew Mawlong : Prestone

Shillong, Naiwieng 2 : U Symbud Myntri Rangbah ka jylla u bah Prestone Tynsong u la ong mynta ka Sngi Balang ba ki 342 tylli ki longïing jong ki Harijan kiba sah ha Them ïew Mawlong kim dei satia kiba la sah beaiñ hynrei ki dei kiba trei ha ka tnad Municipal bad kiwei kiwei ki ophisar sorkar.
“ Phim lah ban kynnoh ba kine ki 342 ki long ïing ki dei kiba sah beain” ong u bah Tynsong haba jubab ïa ki jingkynnoh jong ki katto katne ki seng bhalang.
“ Ka jingkylli ba ki dei kiba sah beaiñ kam dei satia namar kat kum ki jingthoh kiba la don kine ki long ïing ki dei kiba trei ha ka ophis Shillong Municipal Board (SMB) bad kumjuh ruh ba ka ïing Bishar High Court ka jylla” ong u bah Prestone.
Halor ka jingpynkhreh jongka sorkar ban pynkynriah ïa ki sha ki Quarter jongka SMB, u bah Tynsong u la ong ka Harijan Panchayat Committee (HPC) kam pat ai ktien sha ka sorkar hynrei wat la katta ruh ka ïing bishar High Court (HC) ka la bthah ïaki ba ki dei ban ai jubab hapoh saw taiew.
Ka ïing bishar ka la pynmih ïa ka hukum ba ka HPC ka dei ban ai jubab sha ka sorkar hapoh saw taiew. Haba ka ïing bishar ka shong bishar halor kane ka mukotduma, ka sorkar ka la dep ïathuh ba ïa ki jingtyrwa ryngkat ka blueprint la dep aiti sha ka HPC.
Namar ba ka HPC ka la pan por ba ka dang bishar bniah ïa kane ka kam kumta ka ïing bishar ka la ai por ïaki ban jubab hapoh saw taiew bad ka jingshong bishar biang ïa kane ka mukotduma kan long ha ka 16 tarik Rymphang 2023.
Kat kum ka blueprint ba la aiti da ka sorkar sha ka HPC ha ka 29 tarik Nailur 2022 la pynpaw ba ka jingthmu ka long ban tei da ki ïing bun mala ha ki quarter jongka SMB bad ban pynsah ïa baroh 342 tylli ki long ïing ha katei ka jaka.
Lah ruh ban pynkynmaw ba ka HPC ka la pan na ka sorkar mar 200 square meter ka jaka bad ban pyntei ïing da ka sorkar ïa kine ki 342 ki long ïing bad ka jaka ka dei ban long hapoh ka European Ward hynrei ïa kane la kyntait war da ka sorkar.