Ngi kloi ban pdiang ïa ki san ngut ki MLA Congress kiba shah sospon: AITC

Shillong, Naiwieng 02: U President jong ka AITC Meghalaya u Bah Charles Pyngrope ha ka sngi Balang u la ïathuh ba ka AITC ka long kaba la kloi ban pdiang ïa ki san ngut ki MLA ka Congress kiba la shah sospon hadien ba ki la leit ban kyrshan ïa ka sorkar MDA ba la ïalam da ka NPP.
Haba kren sha ki lad pathai khubor u Bah Charles u la ïathuh ba na ka liang ka AITC ka kloi ban pdiang sngewbha ïa kine ki san ngut ki MLA kiba la shah beh shipor ha ka Congress lada ki don ka kwah ban ïakhun ïa ka ilekshon na kane ka Party.
“Ngi khot sngewbha ïa kine ki san ngut kiba shah sospon bad na ka liang jong ngi ngi don ruh ka jingïakren bad ki hynrei ka rai ka shong ha ki la ki kwah ne em”, u la ong.
Haba kylli la ki don ne em ki MLA kiba na ka liang ka AITC ka leit ïakren ban khroh ba kin wan ïakhun noh na ka AITC, u Bah Charles u la ïathuh ba kin dang don katto katne ngut kiban ïasoh sha ka party.
“Ki dang don kiban ïasoh bad ka party ïa mynta pat ban ïathuh katto ngut ngam pat kwah hynrei shen phin sa tip hi namar ka Model Code of Cunduct ruh ka la jan treikam dei ha kata ka por ba phin tip katto ngut kiban rung sha ngi ki don”, u la ong.
Haba kylli pat haduh katno ngut pat ki kyrtong ka AITC ka mut ban pynïakhun bad katno ngut ki la ïoh kyrtong, u Bah Charles u la ong, “ngi kwah ban pynïakhun na baroh ki constituency bad kumba long mynta ngi la ïoh kumba 45 eiei ki kyrtong”.
Shuh shuh u la ïathuh ba na ka liang ka AITC kumba long mynta ka pynkhreh ban ïakhun beit marwei ha kane ka ilekshon.