Shillong, Naiwieng, 02: Ki Sector Commander jong ka tnat shipai Border Security Force (BSF) bad Border Guard Bangladesh (BGB) ki la pynlong ïa ka jingïakynduh lang ha Border Outpost Kilapara, West Garo Hills District na ka bynta ban pynkhlaiñ shuh shuh ïa ka jingïadei hapdeng kine ki ar tylli ki kynhun shipai ïada khappud jong ka ri India bad ka ri Bangladesh.
Ïa ka kynhun shipai BSF la ïalam da u Dy. Inspector General Sector Headquarter, Tura u Harmeet Singh bad ïa ka kynhun shipai BGB la ïalam da u Deputy Director General (DDG) Sector Commander, Mymensingh, Bangladesh u Md. Mahmudur Rahman.
Shwa ban sdang ïa ka jingïalang, u Md. Mahmudur Rahman bad u Harmeet Singh ki la leit buh syntiew ha u mot ba la tei sah kynmaw ïa ki shipai ïada khappud kiba la ïap ha ka thma ba la tei ha War Memorial, Kilapara.
Ha kane ka jingïalang, kine ki arngut ki Sector Commander jong ki shipai ïada khappud ki la ïakren bad ïathir ïatai sani ha kaba ïadei bad ki kam runar ruser kiba ju jia manla ka sngi ha khappud, ka jingkhaii be-aiñ ïa u shyiap, ka jingkhaii be-aiñ ïa ki masi bad kiwei kiwei de ki kam be-aiñ.
Baroh ar kynhun ki la mynjur ban pynkhlaiñ shuh shuh ïa ka jingïadei hapdeng jong ki khnang ban pynthikna ba ka khappud kan don hapdeng ka shongsuk shongsaiñ.
